dogruxeber.tv: - “Dünənki seçkilərin nəticəsindən sonra Ermənistandakı radikal, revanşist qüvvələr başa düşdülər ki, onlar Azərbaycana təkcə hərb meydanında deyil, həm də siyasət meydanında məğlub olublar. Ermənistan anladı ki, istəsə də, istəməsə də, həm 10 noyabr 2020-ci il və 11 yanvar 2021-ci ildə imzalanan üçtərəfli bəyannamələrin tələblərinə əməl etməlidir. Əks halda, ölkə müharibədən sonra düşdüyü quyunun dibində qalacaq”.

Bu fikirləri Milli Məclisin Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov Ermənistanda keçirilən parlament seçkilərinin nəticəsi ilə bağlı danışarkən deyib.

Onun sözlərinə görə, Azərbaycan Ermənistanı həm də siyasi müstəvidə məğlub edib:

“Ermənistandakı revanşist qüvvələr həm 44 günlük məğlubiyyətdən, həm də dünənki seçkilərdən nəticə çıxarmalıdırlar. Onlar başa düşməlidirlər ki, artıq Azərbaycanla hərb, güc dilində danışmaq mümkün deyil. 44 günlük müharibədə Azərbaycan Ermənistanın ordusunu darmadağın edib. Onlar düşünmürlər ki, hansı güclə Azərbaycandan qisas ala biləcəklər? Artıq Ermənistanın ən yaxşı yolu iki bəyannamənin bəndlərinə əməl etmək olar, onların başqa çıxış yolu yoxdur. Seçkilər də göstərdi ki, Ermənistan əhalisi Azərbaycanla müharibə etmək, daha ağır məğlubiyyət almaq istəmir. Bunu ölkədəki digər qüvvələr – revanşistlər də başa düşməlidir. Onlar güc yolu seçsələr, “Dəmir yumruq” onları elə əzəcək ki, bir də yerdən qalxa bilməyəcəklər”.

Milli Məclisin deputatı bildirir ki, Ermənistan əhalisi yeganə çıxış yolunun Azərbaycan və Türkiyə ilə əməkdaşlıqdan keçdiyini anlayıb:

“Azərbaycan əməkdaşlığı seçir, biz hər zaman bunun tərəfdarı olmuşuq. Ermənistanın əhalisi və siyasi qüvvələri normal fikirləşə bilirlərsə, onlar da əməkdaşlıq yolunu seçərlər. Digər bütün variantlar isə onların daha ağır məğlubiyyətinə gətirib çıxaracaq. Düşünürəm ki, dünənki seçkilərin nəticəsindən sonra artıq bu xüsusda addımlar atıla bilər. Ermənistan siyasi müstəvi də Azərbaycanla və Türkiyə ilə əməkdaşlığın yeganə seçim olduğunu gördü. Ermənistan balaca bir dövlətdir, qonşu, güclü ölkələrlə qarşı-qarşıya gəlmək, ərazi iddiası ilə yaşamaqla özlərini məhv edərlər. Müharibədə Ermənistan ordusu ilə bağlı illərdir süni şəkildə formalaşdırılan mif məhv oldu. Bundan sonra Ermənistan ancaq Azərbaycan və Türkiyə ilə əməkdaşlıq haqqında fikirləşməlidir. Yeni kommunikasiya xəttlərinin, Zəngəzur dəhlizinin açılması, sərhədlərin demarkasiyası – onlar artıq bu məsələlər haqda fikirləşməlidirlər. Ermənistanın da mövcud gərginlikdən çıxması üçün bu məsələlərin həlli vacibdir. Bundan sonra isə iki dövlət arasında sülh müqaviləsi barədə düşünmək olar. Ermənistan əhalisi seçkilərdə göstərdi ki, onlar da bunu istəyirlər. Onlar başa düşürlər ki, bu, onlar üçün böyük şansdır və ilk addımı atdılar. Ağılları varsa, bu şansdan istifadə edərlər. Əks halda, “Dəmir yumruq” yenə başlarının üstündə olacaq”.//demokrat.az