Ermənistanın baş naziri Nikol Paşinyan ictimai-siyasi diskussiyalarda təhqiramiz ifadələrə son qoymaq təşəbbüsü ilə çıxış edib.

"dogruxeber.tv" xəbər verir ki, o, 1-5 iyul tarixləri arasında belə ifadələrə qeyri-rəsmi veto tətbiq olunmasını təklif edib və ilk addımı özü atacağını bildirib. Bu barədə siyasətçi "Facebook" sosial şəbəkəsində paylaşım edib.

"Belə bir ictimai razılığa gəlməyi təklif edirəm ki, müəyyən bir tarixdən başlayaraq, ictimai-siyasi və ictimai müzakirələrdə təhqirlərdən və hibrid hücumlardan imtina edib, yalnız təsdiqlənmiş faktlara əsaslanan sivil və qarşılıqlı hörmətə söykənən diskussiyalara keçək", deyə Paşinyan qeyd edib.

Baş nazir 5 iyuldan sonra bu təşəbbüsün cəmiyyət və sosial şəbəkələrdə necə qarşılandığı ilə bağlı fikirlərini bölüşəcəyini əlavə edib.

Qeyd edək ki, iyunun 24-də Paşinyan Ermənistan Apostol Kilsəsinin rəhbəri II Qareginlə şəxsi münaqişə fonunda qalmaqallı bəyanatla çıxış edib və onu "öz cinsiyyət orqanını nümayiş etdirməyə” çağırıb. Buna səbəb keşişin baş nazirin sünnət olunması ilə bağlı iddiası olub.

Paşinyanla kilsə arasında gərginlik may ayından davam edir. Baş nazir kilsədə miras yolu ilə vəzifə və əmlak ötürülməsi praktikasının kilsə qanunlarına zidd olduğunu bildirib. O, həmçinin keşişin subaylıq qaydalarını pozduğunu iddia edib.