Rusiyanın qərb sərhədləri yaxınlığında ABŞ-a məxsus kəşfiyyat təyyarəsi müşahidə edilib.

DogruXeber.tv xəbər verir ki, bir gün əvvəl Qara dəniz üzərində uçuş həyata keçirən Bombardier Challenger 650 Artemis II kəşfiyyat və hədəf toplama təyyarəsi bu dəfə Rusiyanın Kalininqrad vilayəti yaxınlığında qeydə alınıb.

Hava nəqliyyatının idarə olunması sahəsindəki mənbənin bildirdiyinə görə, təyyarə Rumıniyanın Konstansa şəhərində yerləşən aerodromdan qalxaraq Litva və Polşa hava məkanında, həmçinin Baltik dənizinin neytral sularında dövrə vurub.

Qeyd olunur ki, bu tip kəşfiyyat uçuşları regionda ilk dəfə qeydə alınmır. Mənbənin sözlərinə görə, eyni təyyarə bir gün əvvəl Qara dəniz üzərində də bir neçə saat ərzində qərbdən şərqə və əks istiqamətdə uçuşlar həyata keçirib.

Həmin uçuş zamanı təyyarə Rumıniyadan başqa ölkələrin hava məkanına daxil olmayıb və əsasən mülki aviasiya marşrutlarından kənarda fəaliyyət göstərib.

Bundan əlavə, aprelin əvvəlində Qara dəniz üzərində bu tip uçuşlar, o cümlədən Böyük Britaniyaya məxsus Boeing RC-135W Rivet Joint strateji kəşfiyyat təyyarəsi ilə birlikdə də müşahidə olunub.//Ajans.az