Rusiya və Ermənistan arasında Kollektiv Təhlükəsizliyin Qafqaz bölgəsində Birləşmiş Regional Hava Hücumundan Müdafiə Sistemindəki (BRHHMS) qüvvələr və vasitələrin tərkibi ilə bağlı razılıq əldə olunub. dogruxeber.tv-ın “RİA Novosti”yə istinadən verdiyi xəbərə görə, bu barədə jurnalistlərə Rusiya Hava-Kosmik Qüvvələri komandanının birinci müavini general-leytenant Pavel Kuraçenko bildirib.


“Rusiya və Ermənistan Kollektiv Təhlükəsizliyin Qafqaz bölgəsində Birləşmiş Regional Hava Hücumundan Müdafiə Sisteminin (BRHHMS) tərkibinə ayıracaqları qüvvələrin siyahısına dair razılaşmanı imzalayıb”, - deyə Pavel Kuraçenko bildirib.

Sənəd Rusiya və Ermənistan Baş Qərargah rəisləri tərəfindən imzalanıb. Qüvvələr və vasitələrin siyahısı təsdiqlənməsi üçün iki ölkənin müdafiə nazirlərinə təqdim edilib.

Birləşmiş Hava Hücumundan Müdafiə Sistemi 1995-ci ildə Alma-Atada MDB-yə üzv olan 10 ölkə arasında imzalanmış müvafiq razılaşma əsasında yaradılıb. Hazırda BRHHMS-ə Rusiya, Ermənistan, Qazaxıstan, Belarus, Qırğızıstan, Tacikistan və Özbəkistan daxildir.