Bakıda şagirdin intiharına görə cinayət işi başlanılıb.

Unikal.org “Qafqazinfo”ya istinadən xəbər verir ki, 162 saylı məktəbin 8ci sinif şagirdi Elina Hacıyevanın özünü məktəb binasının 3-cü mərtəbəsindən atması və bu gün xəstəxanada ölməsi faktı ilə bağlı Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanılıb.

Hadisənin necə baş verməsi və intihardan öncə şagirdin davranışları, sinif yoldaşlarının, məktəb rəhbərliyinin ona qarşı münasibəti ilə bağlı məktəbin direktoru Sevinc Abbasova hazırda prokurorluqda ifadə verir.

E.Hacıyevanın meyiti isə ekspertiza olunması üçün morqa göndərilib.

*** 12:20

Bakıda özünü məktəbin 3-cü mərtəbəsindən atan şagird Yelena Hacıyeva xəstəxanada dünyasını dəyişib.

Bu barədə "Report"a mərhumun anası Sevil Hüseynova məlumat verib.

Qeyd olunub ki, müştərək kəllə-beyin travması, döş qəfəsi və qarının küt travması, hər iki ağciyərin əzilməsi, sağ 4-cü qabırğanın sınığı, 5-ci döş fəqərəsinin kompressiv sınığı, 9,10 və 11-ci döş fəqərələrinin hündürlük səviyyələrinin azalması, çanaqların sınığı diaqnozu ilə xəstəxananın reanimasiya şöbəsinə yerləşdirilən yaralı bu gün travmatik spinal şok keçirərək ölüb.

Xatırladaq ki, aprelin 4-də Səbail rayonunda yerləşən 162 nömrəli tam orta məktəbin 8-ci sinif şagirdi Yelena Hacıyeva özünü məktəbin 3-cü mərtəbəsindən yerə atıb. Müxtəlif dərəcəli bədən xəsarətləri alan yaralı təcili yardım maşını ilə 1 saylı Kliniki Tibbi Mərkəzə aparılıb.