Karantin dövründə təqribən 40 gün işləməməsi Bakı Metropoliteninə təqribən 6,4 milyon manat fmyda verib.

dogruxeber.tv FED.az-a istinadən xəbər verir ki, bu məbləğ metroda sərnişin daşınmasının maya dəyəri və rəsmi gediş haqqı arasındakı fərqdən yaranıb.
Mayın 8-də keçirilən mətbuat konfransında "Bakı Metropoliteni" QSC-nin İdarə Heyətinin sədri Zaur Hüseynov bildirib ki, karantin dövründə fəaliyyətsiz qalması metronun 29 milyon sərnişin itirməsi ilə nəticələnib. Metropoliten rəhbəri bildirib ki, hələlik bunun nəticəsində dəyən zərər hesablanmayıb: «Lakin biz dəymiş ziyanı pula çevirməmişik. Onu deyə bilərəm ki, metro bağlanandan bu günə qədər orta hesabla 29 milyon sərnişin itirmişik".

Bununla yanaşı, Z.Hüseynov bildirib ki, metroda bir sərnişinin daşınması 52 qəpiyə başa gəlir. Sərnişin daşınması və geşdiş haqqı arasındakı fərqi nəzərə alanda metropoliten hər sərnişinin daşınmasından 22 qəpik itirir. Bu hesablamaya görə, karantin dövründə sərnişinlərin daşınmaması metropolitenə zərər deyil, əslində xeyir gətirib. 29 milyon sərnişinin daşınmaması ilə metropoliten 6 milyon 380 min manata qənaət edib.