Kürdəmir Rayon İcra Hakimiyyətində baş verənlərlə bağlı mediadan xəbər tutdum. Qərargahımla əlaqə saxlamışam. Hazırda Baş Prokurorluğun əməliyyatı davam edir, mənimsəmə, rüşvət faktları ilə bağlı araşdırmalara başlanılıb.
dogruxeber.tv xəbər verir ki,bunu Axar.az-a açıqlamasında 57 saylı Kürdəmir seçki dairəsinin deputatı Əminə Ağazadə deyib. Deputat bildirib ki, hazırda Baş prokuror yanında Korrupsiyaya qarşı Mübarizə Baş İdarəsinin əməkdaşları oradadır:
“Bir neçə nəfər saxlanılıb. İcra başçısının saxlanması ilə bağlı məndə məlumat yoxdur. Dəqiq heç nə deyə bilmərəm. Məndə olan məlumata görə, birinci müavin və şöbə rəisi Natiq Kərimov saxlanılıb”.
Millət vəkili deputatı olduğu rayonda bu cür halların yaşandığına görə üzüldüyünü də vurğulayıb:
“Mən özüm də Korrupsiyaya qarşı Mübarizə Komissiyasının üzvüyəm. Uzun illər prokurorluq orqanlarında çalışmışam. Ölkəmizdə korrupsiyaya qarşı mübarizə sahəsində genişmiqyaslı işlər görülür. Vətəndaşlar tərəfindən müraciətlər olur, araşdırılması ilə bağlı tədbirlər keçirilir. Yəqin ki, mənim təmsil etdiyim rayonda da bu cür faktlar olub. İstintaqın yekununu gözləməliyik. Ümid edirəm ki, bütün günahkarla layiq olduqları cəzanı alacaqlar”.
Qeyd edək ki, hazırda Baş prokuror yanında Korrupsiyaya qarşı Mübarizə Baş İdarəsinin əməkdaşları Kürdəmir RİH-də əməliyyat keçirir. Əməliyyat zamanı icra başçısı və birinci müavini də daxil olmaqla, ən azı 5 nəfərin həbs edildiyi bildirilir.