“YouTube” şəbəkəsinin “MUM Tv” kanalında yayımladığınız 07.09.2020-ci il tarixli video-informasiyada Ağsu şəhər sakini Babayev Vasif Vaqif oğlu çıxış edərək su maşınının əlindən alındığı və işdən qanunsuz çıxarılmasından şikayətlənmiş, əvvəlki iş yerinə bərpa olunmasına kömək göstərilməsi barədə müraciətlərinə baxılmadığını bildirmişdir.

Video-müraciət tərəfimizdən araşdırılmışdır. Müəyyən olunmuşdur ki, Vasif Babayev rayon “Yaşıllaşdırma və Abadlaşdırma” MMC-nin 05 yanvar 2017-ci il tarixli, 01 saylı əmri ilə sürücü kimi işə qəbul edilmiş və 06-AC-199 dövlət qeydiyyat nişanlı “ZOOMLİON” markalı su maşını ona təhvil verilmişdir. V.Babayev işlədiyi müddətdə verilən tapşırıqları vaxlı-vaxtında yerinə yetirməmiş, dəfələrlə rəhbərliklə kobud rəftar etmişdir. İşə istəyinə uyğun davam etmiş, avtomobildən daha çox öz xeyrinə, şəxsi məqsədləri üçün istifadə edərək verilmiş tapşırıqlara laqeyid yanaşmışdır. Müəssisənin rəhbərliyi tərəfindən dəfələrlə onunla aparılan izahedici söhbətlərdən, eləcə də xəbərdarlıqlardan nəticə çıxarmamışdır.

O, cari ilin yanvar ayında RİH başçısının qəbulunda olmuş, müəyyən tələblər irəli sürmüşdür. İzah olunmuşdur ki, məsələ ilə bağlı ilkin olaraq MMC-nin rəhbərliyinə müraciət etməlidir.

Bundan sonra müəssisənin rəhbərliyi bir daha onunla söhbət aparmış, ona tapşırılan işlərdə məsuliyyətli olmağı, şəhər ərazisində olan yaşıllıq sahələrinin suvarılması ilə bağlı müəyyən olunmuş müddətdə işə çıxmasını, istifadəsində olan avtomobilə vaxtlı-vaxtında texniki qulluq göstərməli olduğunu bildirmişdir. Lakin, V.Babayev tələblərlə razılaşmayaraq işdən azad olunmaq barədə ərizəsini təqdim etmişdir. Bu əsasla o, rayon “Yaşıllaşdırma və Abadlaşdırma” MMC-nin 28 yanvar 2020-ci il tarixli, 02 saylı əmri ilə işdən azad olunmuşdur.

Nəzərinizə çatdırırıq ki, V.Babayevin Ağsu Rayon İcra Hakimiyyətinə daxil olmuş 17.02.2020-ci il və 19.06.2020-ci il tarixli eyni məzmunlu ərizələrinə tərəfimizdən baxılaraq ona qanunamüvafiq cavablar verilmişdir. Odur ki, Vasif Babayevin müraciətlərinə baxılmaması barədə kanalınıza açıqladığı məlumatlar həqiqətə uyğun deyil, böhtan xarakterlidir və tələbi əsassızdır.

Bunları nəzərə alaraq “Youtube” şəbəkəsinin “MUM Tv” kanalında yayımladığınız video-informasiya ilə əlaqədar tərəfimizdən verilmiş bu Təkzibin saytınızda dərc olunmasını xahiş edirik.

Ağsu Rayon İcra Hakimiyyəti