dogruxeber.tv: - "Koronavirus əleyhinə peyvənd vurdurulması üçün əks göstərişləri olan insanlar üçün xüsusi sertifikatın hazırlanması nəzərdə tutulur".

Bunu Prezidentin köməkçisi - Prezident Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov jurnalistlərə açıqlamasında deyib.

Onun sözlərinə görə, Səhiyyə Nazirliyi tərəfindən xüsusi komissiya yaradılacaq və həmin şəxslər yoxlanılacaq.
Blidirilib ki, əgər həqiqətən də həmin şəxslərə peyvənd vurulması tövsiyə edilməzsə, o zaman onlara əks göstəriş sertifikatı veriləcək. Həmin sertifikatda da "COVID-19 pasportu"ndakı kimi QR kod olacaq.

Xroniki xəstəlikdən əziyyət çəkən şəxslərə vaksinin vurulmaması məsələnin məlum tərəfidir. Eyni zamanda, peyvənd istehsalçıları yüksək dərəcədə allergiyası olan insanlara peyvənd vurulmasını da məsləhət görmür.

Maraqlıdır, daha hansı xəstəlikərdən əziyyət çəkənlər vaksinasiya oluna bilməz?

Bununla bağlı Cebhe.info-ya danışan infeksionist-hepatoloq Mərdan Əliyev bildirib ki, allergiyalı şəxslərə vaksin vurulmamalıdır:

“Bəzi xəstəliklər var ki, onlara vaksin vurulması tövsiyə olunmur. Çox yüksək dərəcədə allergik xəstəliyi olanlar bura aiddir. Belə şəxslər anafilaktik şok keçirdiblər. Bundan əlavə ağır onkoloji xəstələrə vaksin vurlması tövsiyə olunmur. Çünki onkoloji proseslər immun sistemi ilə əlaqəlidir. Məlumdur ki, vaksin vurulan zaman immun sistemində bəzi proseslər baş qaldırır.

Süd verən və hamilə analarla bağlı da müxtəlif ölkələrdə dəyişik təcrübə mövcuddur. Bəzi ölkələrdə, hətta insanlara də vaksin vurulur.

Xroniki xəstəliyi olanlara vaksin vurulması ilə bağlı çox suallar verirlər. Düşünürəm ki, belə xəstəlikdən əziyyət çəkənlərin əksəri vaksinasiya olunmalıdır. Məsələn, hepatit xəstələrinə vaksin vurula bilər. Hazırda qızdırması, qripi olanların vaksin vurulma prosesi gözlədilir. Bir həftə ara verilib xəstənin sağalması gözlənilir. Bundan sonra həmin şəxslərə vaksin vurula bilər”.

Mərdan Əliyev bildirib ki, vaksin vurulan zaman təzyiq yüksəlir:

“Öz müşahidələrimdən deyə bilərəm ki, “CoronaVac” vaksini bir az təzyiqi qaldıra bilir. Buna görə təzyiqli xəstələrin təzyiqini dərmanla aşağı salıb, sonra vurmaq lazımdır. Təzyiq normadan yuxarıdırsa, dərmanla bunu aşağı salıb, sonra vaksin vurmaq lazımdır.
Vaksin vurulma məsələsində psixoloj xəstəliyi olan insanlar ən çətin qrupdur. Hesab edirəm ki, bu tip şəxslərə vaksin vurulmasını tövsiyə etmirəm. Tibbi və psixoloji yardımdan sonra vurulması mümkündür.

Hələlik 18 yaşdan yuxarı şəxslərə vaksin tövsiyə olunur. Ümimiyyətlə, bəzi vaksinlər var ki, 50 yaşdan yuxarı insanlara vurulur. Peyvənd istehsalçıları bunu özləri 18 yaşdan yuxarı tövsiyə edirlər”.