DogruXebər.az : - "Rüstəm Muradovun fəaliyyətini sülhyaratma missiyası baxımından müsbət dəyərləndirə bilmərik”.

Bu sözləri Sfera.az-a açıqlamasında artıq vəzifəsindən uzaqlaşdırılmış Qarabağdakı Rusiya sülhməramlılarının komandanı, general-leytenant Rüstəm Muradovun fəaliyyətini dəyərləndirərkən, politoloq Nəsimi Məmmədli deyib:

"Bütövlükdə yanaşdıqda, Muradovun fəaliyyətini sülhməramlı missiya kimi dəyərləndirə bilmərik. Birinci növbədə ona görə ki, bu fəaliyyət ümumiyyətlə qanunvericiliklə tənzimlənmir. Rusiyanın rəsmi siyasəti də bu imkanı vermir. Çünki Moskvanın rəsmi siyasətində də eyni dərəcədə fərqli yanaşmalar var.
Muradov daha çox əsirlərin qaytarılması, erməni hərbçilərinin meyitlərinin tapılıb təhvil verilməsi, girov götürülmiş şəxslərin dəyişdirilməsi məsələsində aktivlik nümayiş etdirib. Belədə, mahiyyət etibarı ilə Muradovun fəaliyyətində sülhyaratma baxımından xüsusi nəzərə çarpan hansısa hərəkət olmayıb”.

Ekspert qeyd edib ki, Muradovun nə geniş şəkildə konkret olaraq Azərbaycana qarşı, nə atəşkəsin pozulması əleyhinə, yaxud da hər hansı bir digər qıcıqlandırıcı xüsusi nəzərə çarpan bəyanatları olmayıb:

"Ümumiyyətlə onun fəaliyyətində tərəfləri narazı salacaq hansısa açıqlamalara rast gəlinməyib”.

Bununla yanaşı, həmsöhbətimiz bildirir ki, Rusiya daha çox erməni tərəfinin maraqlarını müdafiə etdiyi üçün, Rüstəm Muradovun fəaliyyətində də bu amil açıq-aydın şəkildə görünüb:

"İlk dövrlər o, daha çox separatçı qüvvələrlə görüş keçirmək, fotolar paylaşmaq, ermənilərin maraqlarına uyğun məsələlərdə xüsusi fəallığı ilə diqqəti çəkirdi. Düzdür, sonradan bu tip məsələlərdə də müəyyən qədər səngimələr oldu”.