dogruxeber.tv: - Xəbər verdiyimiz kimi, Azərbaycan Prezidenti İlham Əliyev dövlət məktəbəqədər təhsil sistemində idarəetmənin təkmilləşdirilməsi haqqında sərəncam imzalayıb.

Sərəncamla dövlət məktəbəqədər təhsil sistemində idarəetmənin təkmilləşdirilməsi, uşaqların məktəbəqədər təhsillə əhatə dairəsinin genişləndirilməsi və məktəbəqədər təhsilin keyfiyyətinin artırılması məqsədilə yerli icra hakimiyyəti orqanlarının (Bakı şəhəri üzrə Bakı Şəhər İcra Hakimiyyətinin, Gəncə şəhəri üzrə Gəncə Şəhər İcra Hakimiyyətinin) tabeliyində olan dövlət məktəbəqədər təhsil müəssisələri (uşaq evləri istisna olmaqla) Azərbaycan Respublikası Təhsil Nazirliyinin tabeliyinə verilib.

Pandemiya dövründə məktəblərlə bağlı iş mexanizminin çətin olduğu bir vaxtda nazirlik bağçalara nəzarəti necə həyata keçirəcək?

DİA.AZ-ın məlumatına görə, mövzu ilə bağlı Cebhe.info-ya təhsil eksperti Kamran Əsədov bildirib ki, 2011- ci ildən uşaq bağçaları Təhsil Nazirliyindən alınaraq, İcra Hakimiyyətlərinə verildi. Bunun əsas məqsədi idaraetmədə çevikliyin təmin dilməsi və s. məsələlər idi: “Amma 10 il bundan əvvəl verilən qərarlarda nəzərdə tutulan hədəflərə çatılmadı. Gördük ki, İcra Hakimiyyətləri uşaq bağçalarının inzibati ərazilərini cəmləşdirdilər, satdılar, maddi- texniki baza inkişaf etmədi. İcra Hakimiyyətləri hədəflənən nəticəyə çata bilmədi. Yenidən uşaq bağçalarının Təhsil Nazirliyinin tabeliyinə verilməsi bir sıra mövcud problemləri aradan qaldıracaq. Birincisi, uşaq bağçalarına qəbulda indiyədək neqativ hallar var idi. Yəni ailə müraciət edəndə yer olmurdu, bağça rəhbərinin tələbindən sonra yer tapılırdı.

İkinci məsələ budur ki, işə qəbul zamanı şəffaflıq yox idi. Orta ixtisaslı şəxslər işə qəbul prosesini təşkil edirdilər. Bu da qanunverciliyin tələblərinin pozulması idi. Tədris zamanı keyfiyyət də müşahidə edilmirdi. Bunlar əslində ciddi məsələlər idi”.

Ekspertin fikrincə, bir məsələ də ondan ibarət idi ki, məktəbəqədər hazırlıq qruplarına qəbulda şagirdlərin sayı ilə bağlı məlumat olmurdu:

“Artıq bağçalar Təhsil Nazirliyinə qaytarılandan sonra bütün yaş həddində olan siniflərlə bağlı elektron baza, məlumat sistemi olacaq ki, bu da yaxşı haldır”.
Təhsil eksperti bildrib ki, bu addım müsbət təcrübə olacaq və ən çox da əsassız qəbulları, pul yığımı kimi neqativləri aradan qaldıracaq. Qeyd edək ki, sözügedən təhsil müəssisələri 2011-ci ildən yerli icra hakimiyyəti orqanlarının tabeliyinə verilmişdi.