Tibb elmləri namizədi, toksikologiya üzrə mütəxəssis, doktor Azər Maqsudov bayram yeməkləri və şirniyyatlarından zəhərlənməmək və necə qidalanmağın yollarını izah edib.

"dogruxeber.tv" bildirir ki, baş toksikoloq Qaynarinfo-ya açıqlamasında ilk növbədə insanları ev şəraitində hazırlanan şoraba məhsullarından uzaq durmağı tövsiyyə edib:

"Konservləşdirilmiş bütün qidalardan uzaq olun. Xüsusi ilə də ev şəraitində hazırlanan bütün şorabalardan, salatlardan istifadə etməyin. İkincisi, bayramlarda hər bir süfrənin bəzəyi mayonezli salatlardır. İnsanlar cürbəcür salatlar hazırlayır. Mayonezli salatlar və yeməklərin saxlanma qaydasına əməl etmək şərtdir. Bu yeməklər və salatların tez bir zamanda tərkibi dəyişir və xarab olur. Hətta soyuducularda belə bu qidaları çox saxlamaq olmaz. Onları sanitar rejiminə uyğun olaraq saxlanılmalıdı. Onun saxlanma müddəti 8-12 saatdır. Bu saatdan sonra salatları və yeməkləri heç buzxanada da saxlamaq məsləhət deyil, insan orqanizmi üçün təhlükəlidir. Ona görə də atılmalıdır. Yoxsa qida zəhərlənməsinə səbəb olacaq. Spirtli içkilərdən istifadə etməyin".

Toksikoloq eyni vaxtda ət, balıq və toyuq yeməklərinin qəbulunun insan orqanizminə zərərli olduğunu vurğulayıb:

"Bir yemək qəbul edilməlidir. Ət, balıq və toyuq bir-birinə qatılanda həzm orqanlarının funksiyası pozulur. Yəni, bu orqanlara böyük yük düşür. Həmin anda ağrı biruzə verilməsə də zamanla bu daxili orqanlarda özünü göstərəcək".

Azər Maqsudovun sözlərinə görə, kərə yağı ilə bişirilən şirniyyatların ömür uzundur:

"Amma bu gün kərə yağı ilə bişirilən şirniyyatlar azdır. Ailələr əsasən ucuz olduğu üçün bitki yağlara üstünlük verirlər. Keyfiyyətsiz yağlardan bişirilən şirniyyatları yeməyin. Bunlar həm vaxtından tez xarab olur, həm də qida zəhərlənməsinə səbəb ola bilər".