2006-cı ildə herpetoloq Bler Heces və onun həyat yoldaşı Karla Hass Barbadosun Sent-Cozef bölgəsindəki Bonvell yaxınlığında meşədə daşları çevirərkən qeyri-adi bir mənzərə ilə qarşılaşıblar. Onlardan birinin altında indiyə qədər qeydə alınmış ən kiçik ilan bükülmüş vəziyyətdə gizlənirdi.

"dogruxeber.tv" xəbər verir ki, Ratqers Universitetindən təkamül bioloqu Skott Trevers "Forbes" nəşrindəki köşəsində dünyanın ən kiçik ilanı olan "Tetracheilostoma carlae" (barbados sapabənzər ilanı) barədə yazıb. Onun sözlərinə görə, bu unikal növ tez-tez qurdlarla səhv salınır.

Trevers bildirib ki, "Tetracheilostoma carlae" zəhərsizdir. Baxmayaraq ki, onlar kor deyillər, lakin görmə qabiliyyətləri olduqca zəifdir. Gözləri yarı şəffaf pulcuqlarla örtülüdür və bu ilanlar həyatlarının böyük hissəsini yerin altında keçirirlər.

Bioloq qeyd edib ki, bu növ əsasən qarışqa və termit sürfələri kimi yumşaq bədənli ovlarla qidalanır. Onlarda nə zəhər vəzili dişlər, nə də daha böyük növlərə xas olan mürəkkəb hücum mexanizmi var.

Trevers əlavə edib ki, "Tetracheilostoma carlae" növünün pulcuqları hamar, başı nazikdir və insanlardan gizlənmək vərdişinə malikdirlər. Bu səbəbdən onları tutmaq heç də asan deyil.

Bu növün uzunluğu cəmi 9 santimetrdən bir qədər çoxdur. Bioloq onu da vurğulayıb ki, onların quyruğu kiçik, zərərsiz bir tikanla bitir.

Uzun illər ərzində alimlər bu qeyri-adi ilanların hansı növə aid olduğunu müəyyənləşdirə bilməmişdilər. Bu növə aid bir nümunə hələ 1889-cu ildə toplanaraq Londondakı Təbiət Tarixi Muzeyində saxlanılıb və uzun müddət başqa bir adaya aid növlə səhv salınıb. 1963-cü ildə Barbadosdakı Kodrinqton kollecinin yaxınlığında toplanmış digər nümunə də Martinikadan olan "Leptotyphlops bilineatus" növü ilə qarışdırılıb.

Trevers qeyd edib ki, dünyanın ən kiçik məlum ilanı bir əsrdən artıq müddət ərzində muzey banklarında qorunaraq gözləyirmiş ki, nəhayət, alimlər bu növün müxtəlif nümayəndələri arasında əlaqəni müəyyənləşdirsinlər.