Ermənistan ordusunun baş qərargah rəisi Movses Akopyanın Azərbaycan Silahlı Qüvvələrinin son təlimlərini şərh etməsinə Azərbaycan Müdafiə Nazirliyindən açıqlama gecikmədi.

Xezerxeber.az-ın məlumatına görə, erməni general təlimləri şərh edərkən Azərbaycan Ordusunun guya erməni silahlılarının gücünü bildiyi üçün hücuma keçmədiyini əsas gətirmişdi.

Azərbaycan Müdafiə Nazirinin müavini general-leytenant Kərim Vəliyevin buna cavabı isə qısa və tutarlı olub. Nazir müavini "Azərbaycan Ordusu hərbi əməliyyatlara başlayarsa, bu, Ermənistan silahlı qüvvələrinin tam darmadağın olması ilə bitəcək"-deyib.


Kərim Vəliyev onu da qeyd edib ki, bu cür məsuliyyətsiz bəyanatlar verməklə Ermənistan silahlı qüvvələrinin rəhbərliyi gələcəyinə inamını itirən erməni xalqını aldatmaqda davam edir.


Kərim Vəliyev əlavə edib ki, ən güclü iqtisadiyyata və maliyyə imkanlarına malik olan qüdrətli dövlətlər belə qısa zamanda ordunun silahlanmasını tam yeniləməyə qadir deyil: "Dilənçi payı və kredit hesabına yaşayan Ermənistan rəhbərliyinin isə bu barədə bəyanatlar səsləndirməsi belə gülüncdür".

Kərim Vəliyev əlavə edib ki, əvvəllər müdafiə haqqında öz xalqına nağıllar danışan Ermənistan hərbi rəhbərliyi "keçilməz Ohanyan xəttindən" bəhs edirdisə, indi də ortalığa atdıqları "Sarkisyan xəttindən" dəm vururlar: "Əslində isə aprel döyüşləri göstərdi ki, münaqişənin həlli mümkündür və xalqımızın torpaqlarımızı azad etmək əzminin qarşısı heç bir sədlə alına bilməz".


Qeyd edək ki, Ermənistan silahlı qüvvələrinin baş qərargah rəisi Movses Akopyan 2016-cı ilin aprel döyüşlərindən cəmi 2 il keçməsinə baxmayaraq Ermənistan ordusunun qısa zamanda yüksək texnologiyalarla təchiz olunduğunu iddia edib. Generalın iddia etdiyi texnoloji yeniliklər isə Rusiyadan kreditlə alınan bir neçə raket və kəşfiyyat-radar sistemlərindən ibarətdir. Halbuki, Azərbaycan bu sahədə hazırda dünyanın ən son texnoloji yeniliklərini tətbiq edir. Silahlanma yarışında Ermənistanın Azərbaycanla rəqabət apara bilməyəcəyini həm ermənilərin özləri, həm də beynəlxalq təşkilatlar dəfələrlə bəyan ediblər.