İspaniyanın Kataloniya bölgəsində polislə etirazçılar arasında baş verən toqquşmalarda 52 nəfər xəsarət alıb.



dogruxeber.tv-ın RT-yə istinadən verdiyi xəbərə görə, 3 nəfərin polis tərəfindən saxlanıldığı bildirilir. İğtişaşlar zamanı 4 polis əməkdaşı yaralanıb.

Məlumata əsasən, 46 etirazçı Barselonada, daha 2-si isə Merida şəhərində xəsarət alıb. Yaralıların həyatına təhlükə olmadığı bildirilir.

Qeyd edək ki, etirazlara ötən gün Kataloniya Muxtariyyətinin sabiq rəhbəri Karles Puçdemonun Almaniya polisi tərəfindən saxlanılması səbəb olub.


27 oktyabr 2017-ci ildə Kataloniya parlamenti regionun müstəqilliyi barədə qətnamə qəbul edib. 135 deputatdan 70-i qətnamənin lehinə səs verib. Bir saatdan sonra isə İspaniya Senatı Konstitusiyanın 155-ci maddəsinin tətbiqi barədə qərar qəbul edib. Nəticədə Kataloniya hökuməti və parlamenti buraxılıb, regiona müvəqqəti rəhbər təyin olunub. Həmin il noyabrın 3-də İspaniya Milli Məhkəmə Palatası K. Puçdemonun həbsinə Avropa orderi verib. Belçikaya qaçmış K.Puçdemon və daha 4 nəfər noyabrın 4-də Brüsseldə polisə təslim olub. Məhkəmə onları şərti azadlığa buraxıb. Onlara Belçikanı tərk etmək qadağan edilib.


Keçən il dekabrın 5-də İspaniya Ali Məhkəməsi Kataloniyanın keçmiş rəhbəri K. Puçdemonun həbsinə dair beynəlxalq orderi ləğv edib. Bu il martın 23-də isə İspaniya Ali Məhkəməsinin hakimi Pablo Lyaren K. Puçdemonun həbsi üçün order verib.