Avropa Liqasının pley-off mərhələsinin ilk oyunu çərçivəsində “Qarabağ” üzərində 1:0 hesablı qələbədən sonra Moldova “Şerif”inin baş məşqçisi Qoran Sabliç mətbuat konfransı keçirib. “Qafqazinfo” xəbər verir ki, o, ilk öncə oyunla bağlı fikirlərini bölüşüb.

- Komandamı qələbə münasibəti ilə təbrik edirəm. Çətin əldə olunan qələbə oldu. Əvvəldən də bunu gözləyirdik. Avroliqa qarşılaşması, ardınca “Milsami” ilə çempionat oyunu və nəhayət, “Qarabağ”la matç. Bütün bunlara tab gətirmək lazım idi. Oyun komponentlərinə gəlincə, yetirmələrim yuxarı-aşağı istədiklərimi həyata keçirdilər. Bir qədər təəssüflənirəm ki, yetərincə gücümüz olan zaman kəsiyində ikinci qolu vura bilmədik. Topu “Qarabağ”a bilərəkdən vermişdik və ümidlərimizi sürətli əks-hücumlara bağlamışdıq. Bir daha təkrar edirəm, heyif ki, bu cür əks-hücumlarda daha bir qola imza ata bilmədik. Hərçənd, belə imkanlarımız var idi. İndi cavab qarşılaşmasına hazırlaşacağıq. Düşünürəm ki, komandam bir həftə sonra daha yaxşı vəziyyətdə olacaq. Uşaqlar xarakter nümayiş etdirdilər. Hər kəs hücumda da, müdafiədə də işlədi. Futbolçularımız belə bir güclü rəqiblə oynamaq iqtidarında olduqlarını nümayiş etdirdilər.

- Yüksək tempi sonadək qorumağa nə mane oldu?

- Yuxarıda da qeyd etdiyim kimi, fiziki durumumuz. Bir həftənin içərisində “Valyur” və “Milsami” ilə iki oyun keçirmişdik. İslandiyadan evə qayıdarkən, demək olar bütün gecəni havada keçirmişdik. Elə “Milsami” ilə matç da xeyli güc sərf etməyimizə səbəb oldu. Bilirdim ki, Azərbaycan təmsilçisi ilə görüşdə bu üzdən çox çətin olacaq. Ancaq yetirmələrimə dözə bildiklərinə görə “əhsən” düşür: taktiki cəhətdən ağıllı oynadılar, intizamı pozmadılar. Bu cür rəqiblərlə ərazi üstünlüyünə sahib olmaq mübarizəsi aparmaq mümkün deyil. Bəli, topa nəzarət edirdilər, ancaq ciddi qol epizodu – son dəqiqədəkini saymasaq – yarada bilmədilər.

- Rəqib sizi nə iləsə təəccübləndirə bildi?

- Bir həftə ərzində xeyli sayda oyunlarını izləmişdik. Heç bir yenilik görmədim. Onlar ərazi üstünlüyü, topa nəzarət hesabına təzyiq göstərməyə çalışırlar. Cinahlarda sürətli oyun göstərmək istəklərindən də xəbərdar idik.

- Müəyyən xətləri gücləndirməyə zərurət hiss olunur...

- Nəyimiz varsa, odu. Əsas məni sevindirən budu ki, meydanda olan hər bir futbolçu cani-dildən mübarizə aparırdı. Əlbəttə, məşqçi kimi mən də əlimin altında daha geniş və istedadlı heyət görmək istəyərəm.