Bakı Ağır Cinayətlər Məhkəməsində içkili vəziyyətdə avtomobil idarə edərək iki nəfərin ölümünə səbəb olan Şamil Həsənovun məhkəməsi keçirilib.

“Qafqazinfo”nun verdiyi xəbərə görə, hakim Rahib Salmanovun icraatında olan prosesdə baxış iclası davam etdirilib.
Qəza nəticəsində vəfat edən Vüsal Quliyevin anası Rəfiqə Quliyeva deyib ki, qəza zamanı Şamil maşını saatda 175-lə sürüb.

Qarşı tərəf isə bunu təkzib edərək 60 km/saat sürətlə getdiyini bildirib.

Məhkəmə qəza ilə bağlı avtoekspertizanın keçirilməsinə qərar verib. Proses qeyri-müəyyən müddətə, ekspertizanın rəyi bəlli olana qədər təxirə salınıb.

İttihama görə, hadisə 2018-ci il martın 12-də saat 02 radələrində Sumqayıt şəhərində baş verib. Şamil Həsənov sərxoş halda idarə etdiyi “Hyunday Azera” markalı 99 DV 039 dövlət qeydiyyat nişanlı avtomobillə Sumqayıt şəhəri, Koroğlu küçəsində Eldar Həsənovun idarə etdiyi 50 BE 671 dövlət qeydiyyat nişanlı “Oka” markalı avtomobillə toqquşub.

Nəticədə E.Həsənov və sərnişini Vüsal Quliyev hadisə yerində vəfat edib.

Şamil Həsənov Bakı Dövlət Universitetinin İlahiyyat fakultəsinin məzunudur. O, AMEA-nın Məhəmməd Füzuli adına Əlyazmalar İnstitutunun böyük elmi işçisi, ilahiyyat üzrə fəlsəfə doktoru Əkrəm Həsənovun qardaşıdır.

Xatırladaq ki, Ş.Həsənov isə özünün avtomobil həvəsi ilə medianın gündəmində olub. Əslən Qubadlıdan olan Ş.Həsənov 039 seriyası ilə avtomobillər nümayiş etdirib. Bildirək ki, bu seriya Qubadlı rayonunun avtomobil dövlət nömrə nişanıdır.

Murad Əhməd