Samux Rayon İcra Hakimi Alı Qocayev haqqında həmin rayonun vətəndaşlarından dogruxeber.tv-ın redaksiyasına onlarla şikayət daxil olmuşdur. Nəzərə alsaq ki, icra başçısı rəhbəri olduğu rayonun sakinlərinin problemləriylə yaxından maraqlanmalıdır, Samux rayonunda isə şikayətlərə əsasən deyə bilərik ki, bunun tam əksi baş verir. Müxtəlif ailələrdən həmin icra başçısı haqqında şikayətləri MUM.TV kanalımızda da dəfələrlə video şəklində işıqlandırmışıq. Növbəti videokadrlarda da göründüyü kimi vətəndaşlar durmadan şikayətlərini edib ölkə başçısı və vitse-prezidentdən kömək istəyirlər. Şikayətçilərdən biri Cavanşir Məmmədov müxtəlif problemlərlə bizə şikayətlər etmişdir.

Samux rayon DSMF-dan əlil qardaşlarına baxan yoldaşı üçün müavinət ala bilməməyiylə bağlı, həmçinin Azərenerjidən 10 yaşlı oğlunun elektrik çarpması nəticəsində ölməsi səbəbindən şikayətlər edən Cavanşir bəy Alı Qocayevin bu məsələlərə biganə yanaşmasından ağızdolusu şikayətlənir. Alı Qocayevin həmin Cavanşir bəyə də münasibəti tamam başqadır. Cavanşir bəyin digər problemli vətəndaşların da şikayətlərini mətbuata göndərdiyi üçün Alı Qocayevin ondan demək olar ki, xoşu gəlmir.

Xanım şikayətçi əlil oğluna baxa bilmədiyi üçün icra başçısının yanına getdikdə “Apar uşağını uşaqlar evinə qoy!” deyən də məhz Alı Qocayev olmuşdur. Hətta xanımın yoldaşı üçün işçilərinə “tutun qulağından atın kamxoza” da deyən Alı Qocayev haqqında əvvəllər yazı da dərc etmişdik. Bir icra başçısının yerli sakinlərə bu cür davranışı ölkə başçısı İlham Əliyevin tapşırıqlarına birbaşa ziddir. Ölkə başçısı dəfələrlə konfranslarda, televiziya vasitəsilə məmurlara ciddi tapşırıqlar verərək onlara vətəndaşlarla mülayim davranmalarını, onların problemləriylə məşğul olmalarını tapşırmışdır.

Belə görünür bu tapşırıqlar Samux Rayon İcra Başçısı Alı Qocayevə aid deyil, daha doğrusu Alı müəllim göstərişləri bir heç sayır. Öz liderinə qarşı inamsızlıq göstərmək və onun əmrinə əməl etməmək birbaşa xəyanət sayılır. Xəyanətin təhlükəli tərəfləri ölkə siyasətinə xələl gətirməklə yanaşı, xalqı hakimiyyətə qarşı qoyur. Bu isə ölkədə xaosun yaranmasının ilkin təməlləri deməkdir.

Xanım şikayətçi qeyd edir ki, ona kömək edə biləcək yaxınları dünyadan köçdükləri üçün indi heç kəsi yoxdur. Bu üzdən yeganə ümid yeri olan Alı Qocayevə müraciət etsə də cavabında hədə-qorxu almışdır. Hətta icra başçısı ona Cavanşir Məmmədovdan uzaq durmağı belə əmr edib. Xanım videokadrlarda da göründüyü kimi deyir ki, heç kəsi yoxdur, yetimdir deyə əlbəttə ona kim nə istəsə edə bilər. Bu cür əlacsız qalmış insanlara sərt münasibət göstərmək dövlət məmuruna yaraşan bir şey deyil. Üstəlik insanlar qarşısında şikayətçinin şəxsiyyətinin alçaldılması qanunvericiliklə yolverilməzdir. əlil arabasındakı uşaqla qəbuluna gələn xanıma “niyə işləmirsən?” deməsi hansı məntiqə əsaslanır? Görəsən, Alı Qocayev həmin xanımın işləyəcəyi təqdirdə uşağına heç kəsin baxmayacağını bilmirmi?