Saatlıda nəinki qohumu, hətta tanıdığı heç bir adam belə olmayan Nahid Bağırov bu rayondan namizədliyini niyə verib?..
Bu sualı Saatlı sakinləri həm özlərinə verirlər, həm də 62 saylı Saatlı seçki dairəsindən öz namizədliyini irəli sürən Azərbaycan Turizm Asossasiyasının İdarə Heyətinin sədri Nahid Bağırova ünvanlayırlar.
Maraqlıdır ki, Nahid Bağırovun Saatlıda seçki kampaniyası tam fiasko ilə davam etməkdədir. Bu arada Saatlıdan gələn məlumatlarda icra hakimiyyəti orqanlarının seçkiyə müdaxiləsi haqda PİA.az-a məlumatlar daxil olmaqdadır. Gələn məlumatlarda göstərilir ki, bütün icra nümayəndələrinə Azərbaycan Turizm Assosiasiyasının rəhbəri Nahid Bağırova kömək etmək və onun görüşünə seçiciləri adminstrativ yolla toplamaq tapşırığı verilib. İddialara görə bir sıra kəndlərin icra nümayəndələri bu tapşırığın birbaşa Saatlının icra başçısı Nazim İsmayıov tərəfindən verildiyini bildiriblər.
Bu tapşırığa əsasən də icra nümayəndələri seçiciləri Nahid Bağırovla görüşə çıxarmağa cəhd eləsələr də buna nail ola bilmirlər. Bu üzdən də Nahid Bağırovun nəzərdə tutulan görüşlərinin heç biri baş tutmayıb.
DoğruXəbər.az PİA.az-a istinadən xəbər verir ki Saatlıdan daxil olan məlumatda bildirilir ki, rayonun Azadkənd, Camışlı, Qaralar, Qaracalar, Seyidlər, Kamallı kəndlərində narazılıq və qarşıdurma yaranıb. Buna səbəb isə icra nümayəndələrinin müxtəlif vasitələrlə, hətta polisin köməyi ilə sakinləri Nahid Bağırovla görüşə cəlb etmək istəmələri olub. Bütün səylərə baxmayaraq əhali Nahid Bağırovla görüşə getməyib və adlarını çəkdiyimiz kəndlərdə seçicilərin deputatlığa namizədlə görüşü baş tutmayıb.