“Keçmiş satılmış işçilərimizi, bəzi hakimləri, dövlət adamlarını satılan mal kimi alıblar. Onlar da mal kimi pul qulu olublar, özlərində nə şərəf, nə namus qoyublar. Oğrular, xainlər və FETÖ-çular bir tərəfdə qalıb, bunlar məni ağlın qəbul etmədiyi şeylərlə günahlandırırlar”.
Publika.az xəbər verir ki, bu sözləri Türkiyə vətəndaşı olan azərbaycanlı iş adamı Mübariz Mənsimov sosial media hesabında paylaşıb.
Biznesmen bildirib ki, ona qarşı çox çirkin oyun qurulub: “Məni terrorla, FETÖ terror təşkilatı ilə əlaqədə və casusluqda yalandan ittiham edərək, günahlandırmaq istəyirlər. Bunu edənlər öz maraqlarını reallaşdırmaq istəyənlərdir. Bütün bunlara gülüb keçirəm. Bir zamanlar o xocanın (Fətullah Gülən) arxasınca qaçanlar indi mənə şər atırlar. Bunların hamısı yalan və uydurmadır və asanlıqla sübut etmək heç də çətin deyil. Onlar bunu ediblər və bir gün bunun cəzasını çəkəcəklər. Bədbəxtlər, hələ də anlamırsınız ki, sahibləriniz sabah sizi də satacaq. Məni ən çox kədərləndirən bu satılmışların arasında soydaşlarımın da olmasıdır. Məni düşmənmi sayırsınız? Mən düşmən deyiləm. Bilin ki, etdiyiniz şərəfsizliyi düşmən belə etməzdi. Bu məni dərindən yaralayıb. Mənə FETÖ-çu deməkdənsə, öz keçmişinizə və övladlarınızın harada təhsil aldığına baxın”, – Mənsimov qeyd edib.