Rusiyanın Xankəndiyə göndərdiyi Fövqəladə Hallar Nazirliyinin əməkdaşları burada ermənilərin sosial vəziyyətinin yaxşılaşdırılması və infrastrukturun qurulmasını həyata keçirir. İlk növbədə, bu, sülhməramlı missiyasına uyğun deyil.

Bu sözləri Axar.az-a politoloq Məhəmməd Əsədullazadə deyib.

O bildirib ki, ötən gün Xocalıda qondarma separatçı rejimin “fhn nümayəndəsi” Rusiya FHN əməkdaşlarına üzərində separatçı rejimin əski parçası olan “medal”lar verərək “təltif edib”:

“İlk növbədə Rusiya FHN-nin bu qanunsuz medalları alması separatizmə dəstək verməsi deməkdir. Bu, Rusiyanın Dağlıq Qarabağda sülhməramlı fəaliyyətindən nə qədər kənar olduğunu göstərir”.

Politoloqun fikrincə, Rusiya öhdəliklərini yerinə yetirmir:

“Azərbaycan bu haqda Rusiyaya nota verməli, bu kimi qanunsuz medalları qəbul etdiyinə görə Xarici İşlər Nazirliyi Rusiya səfirindən izahat tələb etməlidir”.