Ötən həftədən başlayaraq Azərbaycandakı satış şəbəkələrində bir sıra əsas ərzaq məhsullarının qiymətində ciddi artım baş verib. Bahalaşma əsas ərzaq məhsullarını əhatə edir və orta hesabla 10-20%, bəzi məhsullarda isə 35%-ə qədər dəyişir. Ərzaq məhsullarının bahalaşması əhali arasında narazılıq yaradıb və sosial şəbəkələrdə müzakirələrə səbəb olub. Sadə vətəndaşlar bildirirlər ki, bəzi məhsullar, xüsusilə də duru yağlar üzrə artım hətta 40%-dən çoxdur və bahalaşmanı artıq ciblərində də hiss edirlər. Məsələn, sosial şəbəkə istifadəçiləri qeyd edirlər ki, əvvəl bir bazarlıq 200 manata başa gəlirdisə, indi bu rəqəm 240-250 manat təşkil edir.