dogruxeber.tv: - Azərbaycan dövləti Vətən müharibəsində qələbə qazanmaqla həm də 30 il ərzində vəhşicəsinə dağıdılmış əraziləri bərpa etmək kimi ağır bir vəzifəni boynuna alıb. Artıq Qarabağda yenidənqurma işləri böyük sürətlə davam edir. Bəs qaçqın və məcburi köçkünlərimiz nə zamandan öz yurd-yuvalarına qayıdacaqlar?

Mövzu ilə bağlı deputat Razi Nurullayev açıqlama verib.

"Bu gün Azərbaycan dövləti qaçqın və köçkünlərimizin tez bir zamanda öz yurd-yuvalarına qayıtması üçün çalışır. Bunun üçün dövlət əlindən gələni əsirgəmir və bütün imkanlardan istifadə edir.

Müharibə getdiyi müddətdə belə, həmin ərazilərdə quruculuq işləri aparılırdı. Bu baxımdan düşünürəm ki, ilin sonuna müəyyən köçürülmələr olacaq. Məsələn, əhali Şuşa şəhərinə köçürülə bilər. Düşünürəm ki, 2023-cü ilin axrından başlayaraq, artıq yavaş-yavaş insanlar digər ərazilərə də qayıda biləcəklər.

Artıq bildiyiniz kimi, işğaldan azad olunan ərazilərdə minalardan təmizlənən sahələr əkilib, hətta bu gün orada taxıl biçilir. Kənd təsərrüfatı artıq tamamilə ayaqdadır. Yeni planlar var. Su hövzələrinin təmizlənməsi və quraşdırılması prosesi gedir. Bütün bunlar onu deməyə əsas verir ki, əslində Qarabağa biz kənd təsərrüfatı olaraq, dövlət idarələri olaraq qayıtmışıq, indi növbəti mərhələdə öz yurd-yuvalarından didərgin düşənlər qayıdacaqlar. Artıq Qarabağda evlər tikilməyə başlayıb. Zəngilanda və Ağdamda "ağıllı şəhər", "ağıllı kənd" layihələri çərçivəsində evlərin 0-dan tikintisinə başlanılıb. Digər ərazilərin də baş planları qurulub və tikinti şirkətləri müəyyənləşdirilib".//Sonxeber.az