“Avropa dövlətləri koronavirusa qarşı mübarizə tədbirlərini sərtləşdirməsələr, qitədə bu qış yarım milyon insan pandemiyanın qurbanı ola bilər”.

Bunu Ümumdünya Səhiyyə Təşkilatının Avropa bürosunun rəhbəri Hans Klyuqe deyib. O bildirib ki, koronavirus Avropada artan templərlə yayılır. Klyuqe “COVID pasportları”na etiraz aksiyalarından da danışıb. “Bu sənədlər azadlığı məhdudlaşdırmır, əksinə, hüquqları müdafiə edir”, - deyə bildirib.

Maraqlıdır, belə olan halda sərt karantin yenidən qayıda bilər?

Mövzu ilə bağlı Cebhe.info-ya infeksionist Mərdan Əliyev danışıb.

O, bildirib ki, Azərbaycanda virusla bağlı sərtləşmə gözlənilmir:

"Bəzi lokal tədbirlər ola bilər. Məsələn, məktəblər yenidən karantinə görə bağlana bilər. Bu halın uşaq bağçalarında da olması mümkündür. Ölkə üzrə tam karantin gözlənilmir. Çünki bunun üçün hazırda səbəb yoxdur.Yoluxma sayı iki min rəqəmi ətrafında dəyişir. Sağalanların sayı yoluxanların sayı ilə təqribən eynidir. Aktiv xəstə sayı hazırda sabitdir".

İnfeksionist bildirib ki, virus infeksiyaları daha çox payız aylarının başlanğıcında olur: "Artıq qış aylarına doğru davam edir. Ümumi götürəndə virusa yoluxma dinamikası payız aylarına nisbətən daha aşağı səviyyədə olur. Koronavirus adətən payız və yaz aylarında aktivləşir".