DogruXeber.TV xəbər verir ki, Cəbrayıl rayonunun Horovlu kəndində yaşayan sakinlər uzun müddətdir ki, səssizliyə həsrət qalıblar. Kəndin yaxınlığında yerləşən yüksəklikdə mobil rabitə və digər telekommunikasiya xidmətlərinin təmin olunması məqsədilə quraşdırılmış anten komplekslərinin fəaliyyəti insanların həyatını ciddi şəkildə çətinləşdirir.

Məsələ rabitə xidmətinin göstərilməsi deyil. Müasir dövrdə rabitə infrastrukturunun qurulması vacib və zəruri məsələdir. Narazılıq yaradan əsas səbəb isə həmin avadanlıqların enerji təminatı üçün istifadə olunan generatorlardır. Sakinlərin sözlərinə görə, generatorlar sutkanın 24 saatı fasiləsiz işləyir və onların yaratdığı güclü səs kənd əhalisinin gündəlik həyatını sözün həqiqi mənasında əsirə çevirib.

Sakinlərin bildirdiyinə görə, generatorlarla təmin olunan həmin anten və avadanlıqlar əsasən Azercell və Bakcell şirkətlərinə məxsusdur. Məhz bu avadanlıqların enerji təminatı məqsədilə istifadə olunan generatorlar kənd əhalisinin haqlı narazılığına səbəb olur.

Ərazinin coğrafi xüsusiyyəti problemi daha da ağırlaşdırır. Anten kompleksinin yerləşdiyi nöqtə yüksək təpədə olduğundan generatorların səsi geniş əraziyə yayılır. Nəticədə yalnız yaxınlıqda yaşayan ailələr deyil, kəndin böyük hissəsi bu səs-küydən əziyyət çəkir.

Video görüntülərdə də aydın görünür ki, ərazidə yaranan səs-küy adi texniki avadanlığın çıxardığı səsdən qat-qat artıqdır. Bu səsin fonunda saatlarla, günlərlə, aylarla yaşamağın insan psixologiyasına necə təsir etdiyini təsəvvür etmək çətin deyil. Yaşlılar, azyaşlı uşaqlar, xəstələr və ümumiyyətlə ev şəraitində istirahət etməyə çalışan insanlar davamlı narahatlıq içərisindədirlər.

Maraqlı məqam isə budur ki, sakinlərin sözlərinə görə, məsələ ilə bağlı dəfələrlə müraciətlər edilib, müxtəlif səviyyələrdə narazılıqlar bildirilib. Lakin bütün bunlara baxmayaraq, problem hələ də öz həllini tapmayıb. Bu isə istər-istəməz suallar yaradır.

Doğrudanmı milyonlarla manatlıq dövriyyəyə malik olan şirkətlər üçün daha təhlükəsiz və səssiz enerji təminatı yaratmaq mümkün deyil? Doğrudanmı daimi elektrik təchizatı və ya daha müasir texniki həllər tətbiq etmək əvəzinə ən ucuz variant seçilərək insanların rahatlığı ikinci plana keçirilir?

Əgər məsələ yalnız texniki zərurətdən qaynaqlanırsa, o zaman niyə bu qədər müddət ərzində alternativ həll yolları araşdırılmayıb? Yox əgər burada iqtisadi qənaət amili üstün tutulursa, bu halda həmin qənaətin bədəlini niyə kənd sakinləri ödəməlidir?

İnfrastruktur layihələri insanların həyatını asanlaşdırmaq üçün qurulur, onların rahatlığını əlindən almaq üçün yox. Rabitə xidmətinin keyfiyyətinin yüksəldilməsi vacibdir, lakin bu, vətəndaşların dincliyi və sağlamlığı hesabına həyata keçirilməməlidir.

Ümid edirik ki, aidiyyəti qurumlar və adı hallanan şirkətlər Horovlu kəndində yaranmış vəziyyətə biganə qalmayacaq, sakinlərin haqlı narahatlıqlarını nəzərə alacaq və problemin həlli istiqamətində real addımlar atacaqlar. Çünki insanların yaşadığı mühitdə rahatlıq və dinclik də ən az rabitə siqnalı qədər vacibdir.

DogruXeber.TV-nin məlumatına görə, sakinlər problemin uzun müddətdir davam etdiyini, dəfələrlə müraciətlər edilməsinə baxmayaraq nəticə əldə olunmadığını bildirirlər və məsələ ilə bağlı aidiyyəti qurumların müdaxiləsini gözləyirlər.