dogruxeber.tv: - Azərbaycan Həmkarlar İttifaqları Konfederasiyasının sədri, Azərbaycan Respublikası Milli Məclisinin deputatı Səttar Möhbalıyev barəsində yazarkən nənələrin bir sözü yada düşdü:
Deyirdilər ki, filankəs Nikolayı taxtda görüb, Lenini qundaxtda...
Doğrudan da, bu adam 30-40 ildir ki, Həmkarlar Konfederasiyasının hesabına milyonlara sahib olub.
Məlumdur ki, bütün sivil dünyada Həmkarlar əməkçinin ( fəhlənin, kəndlinin və s ) hüquqlarını qorumaq üçün yaradılıb.
Loru dildə desək, həmkarlar bir əməkçinin ayağına daş dəyən kimi, onun müalicəsini, müavinətini, ailəsinin təminatını tələb edir.
Neçə ildir oxuyuruq ki, fəhlə yeni tikilən binanın 10-cu mərtəbəsindən yıxılaraq öldü.
Bircə dəfə də olsun, belə məqamda Səttar müəllimin səsini eşidən olmayıb.
O boyda konfederasiyanın sədri soruşmur ki, bu fəhlənin əmək müqaviləsi var idimi..?
Bu fəhlə realda və kağız üzərində nə qədər maaş alırdı..?
Bu fəhlə gündə neçə saat işləyirdi..?
Qarabağ qazisi bir neçə il əvvəl özünü Həmkarlar Konfederasiyasının qarşısında yandıraraq intihar etdi.
Səttar müəllimin heç tükü də tərpənmədi.
Bəli, bu gün müasir dünyada HƏMKARLAR adlı qurum söz sahibidir. Bizdə isə formal qurumdur.
Səttar Möhbalıyev hər yerdə deyir ki, mən demokratik yolla qurumun sədri seçilmişəm.
Ay Səttar müəllim, cəbhəçilərin hesabına 1993-cü ildə özünü Həmkarlara sədr edə bildin. Hansı demokratik seçkidən danışırsan..?
Cənab Möhbalıyevdən soruşan lazımdır ki, sən “tovaraved” ola-ola necə gəlib Respublika Həmkarlarının sədri oldun..?
Bəli, Möhbalıyev cəbhə hakimiyyəti dövründə 1993-cü ilin fevralında AHİK-in təsis qurultayında sədr seçilmişdir.
O, sonradan 1998, 2003, 2008, 2013, 2018-ci illərdə AHİK-in I, II, III, IV və V qurultaylarında yenidən bu vəzifəyə seçilmişdir.
Dünyada bunun analoqu yoxdur ki, 5-6 dəfə qurultayda quruma sədr seçilə.
Bəli, Səttar Möhbalıyev son 30 ildə qurumu ailə biznesinə çevirib.
Səttar Möhbalıyevin xanımı, 1960-cı il təvəllüdlü Böyükxanım Mirzə qızı Möhbalıyeva onun rəhbərlik etdiyi qurumun beynəlxalq əlaqələr departamentinin əməkdaşıdır. Qızı, 1988-ci il təvəllüdlü Lalə Möhbalıyeva isə Həmkarlar İttifaqları Konfederasiyasının Gənclər Şurasının üzvüdür. Konfederasiyanı xarici ölkələrdə keçirilən tədbirlərdə bir qayda olaraq deputatın xanımı və qızı təmsil edir. Yəni tam bir “ailə konfederasiyası”.
Təsəvvür edirsiniz, işləyən vətəndaşlardan hər ay həmkarlara üzvlük haqqı tutulur və bunun məbləği təxminən 50 milyon manatdır.
Bu vəsaitin necə xərclənməsi Səttar Möhbalıyevdən başqa kimsəyə məlum deyil. AHİK sədri bu barədə bircə dəfə də hesabat vermir.
Səttar Mehbalıyevin xanımı Türkiyədə “Sat Turizm Diş Ticaret Limited” şirkətini təsis edib. 2009-cu ildə Səttar və Böyükxanım Möhbalıyevlər şirkəti 380 min lirə (o zamankı valyuta kursu ilə 250 min dollar) İstanbulda qeydiyyatdan keçiriblər.
Şirkətin hazırda Türkiyədə ticarətlə, turizmlə məşğul olan şöbələri, səyahət büroları, gözəllik salonları (saç əkimi, lazer epliyasiya, botoks, mezzoterapi), gimnastika zalları, bərbərxanalar, restoranlar açmaq hüququ var.
Səttar Möhbalıyev 30 ildir Həmkarların sədri olmaqla bərabər, həm də Milli Məclisin üzvüdür.
O, 30 ildir “Kurort” Səhmdar Cəmiyyətini talamaqla məşğuldur.
Səttar Möhbalıyev deyir ki, deputatlar məndən putyovka tələb edirlər...
Bəli, Səttar müəllim, sən hər il putyovkalardan milyonlar qazanırsan...
Və əsasən də putyovkaları sənə yaxın olan şəxslərin istirahət mərkəzlərinə yönəldirsən və “faizini” alırsan... (sualınız olsa, bilirsiniz ki, dəqiq cavab var)
Maraqlıdır ki, ölkənin müxtəlif bölgələrində istirahət mərkəzləri, hotellər, sanatoriyalar olsa da, Səttar Möhbalıyev dostlarının həmkarlarının obyektlərinə üstünlük verib.
AHİK-in nəzdində “Kurort” Qapalı Səhmdar Cəmiyyəti (QSC) fəaliyyətdədir ki, QSC-yə 8 sanatoriya, 1 müalicə pansionatı və 10 istirahət bazası daxildir. Bu müalicə-istirahət zonalarına putyovkaları almaq üçün Səttar Möhbalıyevin qaydaları mövcuddur və bu qaydalar heç yerdə yazılmayıb!
Həmkarlar ittifaqında baş verən korrupsiya, maliyyə maxinasiyaları və qanun pozuntuları haqda tam təsəvvür yaratmaq üçün bir neçə statistik göstəriciyə nəzər yetirmək kifayətdir. AHİK-in sədri həm də Azərbaycan Təhsil İşçiləri Azad Həmkarlar İttifaqının rəhbəri olduğundan əvvəlcə elə bu sahədəki qüsurlar diqqət çəkir. Məsələn, ölkə üzrə təxminən 170 min orta məktəb müəllimi var, onların həmkarlara qoşulmaq üçün üzvlük haqqı maaşının 2 faizini təşkil edir. 1 il ərzində bu vəsait 10 milyon manata yaxındır. Nə vaxtsa bu pulla müəllimlər putyovka ilə müxtəlif yerlərə istirahətə göndərilirdi...Ölkədə təxminən 85 min neftçi var. Onların maaşlarından həmkarlara gedən pul da ən çoxu 2 faizdir. Neft sənayesində orta maaş 500-750 manat olduğunu nəzərə alsaq, neftçilərin həmkarlara aylıq ödənişləri təxminən 1 milyon 250 min manata yaxındır. Bu isə il ərzində 15 milyon manatdan yuxarı məbləğ deməkdir. Hər kəsə bəllidir ki, ölkədaxili sanatoriya putyovkaları həmkarlar üzvlərindən çox həmkarlar təşkilatları ilə heç bir əlaqəsi olmayan insanlara 300-500 manat civarında pula satılır. Ümumiyyətlə, həmkarlar şəbəkəsində daha çox korrupsiyalaşmış mexanizm putyovkalarla bağlıdır. Çünki il ərzində toplanan külli miqdarda vəsaitin böyük bir hissəsi məhz bu vasitə ilə silinir.
Yeri gəlmişkən, yaxın zamanda Həmkarlar Konfederasiyasının qurultayının keçirilməsi gözlənilir.
Səttar Möhbalıyevin sədr seçilməyəcəyi artıq bəllidir.
Bəs, Səttar Möhbalıyevi hara göndərəcəklər..?
Bax, bu sualın cavabı yaxın zamanlarda bəlli olacaq.
Səttar müəllim, deyəsən, bu dəfə səni deyirlər…
Yazıda müxtəlif saytlarına materiallarından istifadə edilmişdir.
Qarşı tərəfin mövqeyini dərc etməyə hazırıq. //gundelik-baku.com//