ABŞ-ın Çikaqo və Yel universitetlərindən bir qrup alim Vyana Universitetinin avstriyalı həmkarları ilə birlikdə 700 milyon ildən çox əvvəl Neoproterozoy erasında Yerin tam buzlanmasının səbəbləri ilə bağlı müzakirələrə qoşulublar. Onların fikrincə, uzun sürən soyumaya meteoritlər səbəb ola bilərdi.

"dogruxeber.tv" xəbər verir ki, tədqiqatın nəticələri "Science Advance" (SciAdv) elmi jurnalında dərc olunub.

Məlumdur ki, təxminən 717 milyon il əvvəl Yer qütblərdən ekvatora qədər buzla örtülmüş, qar kürəsinə çevrilib. Planet növbəti 52 milyon il ərzində bu vəziyyətdə qalıb.

Komanda asteroidin təsirindən yaranan xarici təsirlər nəticəsində kəskin iqlim dəyişikliyi ehtimalını araşdırıb. Alimlər müxtəlif şəraitdə dəniz buzunun əmələ gəlməsini nəzərə alan atmosfer və okean sirkulyasiyasının kompüter simulyasiyalarını aparıblar.

Nəticələr göstərib ki, böyük meteoritin zərbəsi planeti cəmi 10 il ərzində dondura bilər, ekvatorda buzun qalınlığı 10 metrə çatar, bu da müasir Arktikadan üç dəfə çoxdur. Bu sürət 700 milyon il əvvəl planetin artıq kifayət qədər sərin yer olması ilə izah olunur.