Qərar vermək məcburiyyətində olmaq beyni çox yükləyir.

"dogruxeber.tv" xəbər verir ki, Paris Beyin İnstitutunun alimləri bu qənaətə gəliblər. İşin nəticələri “Current Biology” jurnalında dərc olunub.

Xırda tapşırıqlarla dolu günün sonunda insan rasional qərarlar qəbul etməkdə çətinlik çəkə bilər. Qranada Universitetinin ispan alimlərinin müşahidələrinə görə, insan beyni səhərlər ən balanslı seçimi edir, axşam isə davranışda impulsivlik üstünlük təşkil edir. Eyni zamanda, daha çox qəbul edilən qərarlar beynin “aşırı yüklənməsinə” səbəb olur.

Seçmək məcburiyyətinin niyə psixi yorğunluğu artırdığını öyrənmək üçün fransalı tədqiqatçılar 40 könüllünün beyinlərinin MRT müayinəsi aparıblar. Alimlər izah ediblər ki, qərar qəbul edərkən beynin müxtəlif hissələri elektrik siqnalları mübadiləsi aparır. Bu siqnalların ötürülməsi üçün qlutamat adlı kimyəvi maddə lazımdır.

Araşdırmalar göstərib ki, qərarlar qəbul edildikdən sonra qlutamat beyində toplanır. Üstəlik, hər yeni seçimlə onun konsentrasiyası artır ki, bu da ayıq düşünmə qabiliyyətini pozur.

Bu, əlavə təcrübədə təsdiqlənib. Alimlər subyektləri iki qrupa bölərək onlardan çətin və sadə yaddaş tapşırıqlarını yerinə yetirməyi xahiş ediblər. Hər bir tapşırıq müəyyən miqdarda virtual pulla qiymətləndirilirib. Hər tapşırığı yerinə yetirdikdən sonra iştirakçılara mükafatı indi və ya daha sonra, lakin daha böyük məbləğdə almaq seçimi verilib.

Mürəkkəb işlərdən yorulan könüllülər daha çox ani faydalara üstünlük verirdilər. Alimlərin fikrincə, onlar düşünmək üçün ən az səy tələb edən variantı seçiblər.