ABŞ prezidentinin OPEC-i neft qiymətlərini azaltmağa çağırması və eyni zamanda vəzifəsinin ilk həftəsində ABŞ-da neft və qaz hasilatını artırmaq tədbirlərini elan etməsi nəticəsində bazar ertəsi neftin qiymətində azalma müşahidə olunub.

"dogruxeber.tv" xəbər verir ki, bu barədə "Reuters" məlumat yayıb.

Brent markalı neftin fyuçersləri cümə günü 21 sentlik artımdan sonra 87 sent və ya 1,11% azalaraq barreli 77,63 dollar olub.

West Texas Intermediate (WTI) markalı Amerika nefti isə barreli 73,77 dollara satılaraq 89 sent və ya 1,19% ucuzlaşıb.

Bununla belə, OPEC və Rusiyanı da əhatə edən müttəfiqləri hələ Trampın çağırışına reaksiya verməyib. OPEC+ nümayəndələri isə apreldən hasilatın artırılmasını nəzərdə tutan planın artıq hazır olduğunu bildiriblər.

Xatırladaq ki, ABŞ prezidenti Donald Tramp 24 yanvar tarixində qlobal iş adamları və siyasi liderlərə müraciətində OPEC-dən neftin qiymətlərini endirməyi və faiz dərəcələrini azaltmağı tələb edib. O, həmçinin xəbərdarlıq edib ki, əgər məhsulları ABŞ-dan kənarda istehsal etməyə davam etsələr, tariflərlə üzləşəcəklər.