Məşhur Hollivud rejissoru Ceyms Kemeron Yeni Zelandiya vətəndaşlığı almağı və bu ölkədə daimi yaşamağı planlaşdırır. O, bu qərarı ABŞ-da Donald Trampın prezident seçilməsindən sonra verib.

"dogruxeber.tv" xəbər verir ki, bu barədə rejissor Stuff nəşrinə müsahibəsində danışıb.

Jurnalist ona Trampın ikinci prezidentlik dövrü haqqında nə düşündüyünü soruşduqda, Kemeron cavab verib: "Dəhşətlidir".

"Mən hər şeyin pisə doğru dəyişdiyini görürəm. Amerika artıq heç bir dəyəri müdafiə etmir, əgər o, tarixi dəyərlərini qoruyub saxlamırsa…" – deyə o bildirib.

Qeyd edək ki, "Titanik" filminin rejissoru son 14 il ərzində qismən Yeni Zelandiyada yaşayıb. O, 2012-ci ildə orada bir süd ferması alıb, daha sonra isə kino istehsalı ilə məşğul olmağa başlayıb. 2023-cü ilin payızında Variety-yə verdiyi müsahibədə bildirib ki, bütün "Avatar" filmlərini Yeni Zelandiyada çəkəcək.

Hazırda isə Kemeron Yeni Zelandiya vətəndaşlığı almağı "qaçılmaz" adlandırıb.

Onun sözlərinə görə, Yeni Zelandiyada yaşamağın ən yaxşı cəhətlərindən biri Donald Tramp haqqında xəbərlərdən uzaq qalmaqdır.

"Mən sadəcə olaraq bu adamın üzünü qəzetin birinci səhifəsində görmək istəmirəm. Bu, dəfələrlə avtomobil qəzasına tamaşa etməyə bənzəyir", – deyə rejissor vurğulayıb.

Ceyms Kemeron "Oskar" mükafatı laureatı olan rejissordur və "Titanik", "Avatar", "Terminator" kimi filmləri ilə tanınır. O, Kanadada doğulub, lakin ömrünün böyük hissəsini ABŞ-da keçirib və karyerasını orada qurub. Dünyanın ən uğurlu rejissorlarından biri sayılır: onun yeddi filmi birlikdə 5,6 milyard dollardan çox gəlir əldə edib.