Heidelberg Universiteti və digər institutlardan olan alman alimləri müəyyən ediblər ki, hətta smartfondan istifadədə qısamüddətli məhdudiyyət belə dopamin və serotoninlə əlaqəli beyin fəaliyyətini əhəmiyyətli dərəcədə dəyişir. Bu nörotransmitterlər əhval-ruhiyyəni və asılılığı tənzimləyir.

"dogruxeber.tv" xəbər verir ki, araşdırma “Computers in Human Behavior” (CHB) elmi jurnalında dərc olunub.

Komanda gündəlik həyatlarında smartfonlardan aktiv istifadə edən 18-30 yaş arası 25 gənci işə cəlb edib. İştirakçılar qadcetdən istifadə vərdişlərini və emosional vəziyyətlərini qiymətləndirmək üçün psixoloji testlər və anketləri tamamlayıblat. Daha sonra onlardan smartfon istifadəsini 72 saat məhdudlaşdırmaq, cihazlardan yalnız iş, gündəlik işlər və yaxınları ilə ünsiyyət üçün istifadə etmək istənilib.

Təcrübədən əvvəl və sonra könüllülər funksional maqnit rezonans tomoqrafiyasından (fMRT) istifadə edərək beyin skanından keçiblər. Skan zamanı onlara neytral səhnələrin (məsələn, landşaftların) təsvirləri, həmçinin açılıb-söndürülmüş smartfonlar göstərilib.

Məlum olub ki, smartfondan istifadənin məhdudlaşdırılması mükafat və ehtirasla əlaqəli beyin bölgələrinin fəaliyyətini əhəmiyyətli dərəcədə dəyişib. Bu dəyişikliklər insanların narkotik və ya alkoqol kimi asılılıq yaradan maddələrdən uzaqlaşdığı zaman müşahidə olunan dəyişikliklərə bənzəyir.

Smartfonlardan çox istifadə edən iştirakçılar və orta dərəcədə istifadə edənlər də oxşar reaksiyalar göstəriblər. Bu onu göstərir ki, hətta müntəzəm smartfon istifadəsi beyində dəyişikliklərə səbəb ola bilər.

Tədqiqatçılar qeyd ediblər ki, smartfondan istifadənin məhdudlaşdırılması əhval və davranışdakı dəyişiklikləri izah edə bilən dopamin və serotonin səviyyələrinə təsir edib.

Alimlər smartfondan istifadəyə vaxt məhdudiyyəti qoymağı, qadcetlərdən yalnız zəruri tapşırıqlar üçün istifadə etməyi, müntəzəm fasilələr verməyi və oflayn fəaliyyətlərə vaxt ayırmağı tövsiyə edirlər.