Azad İstehlakçılar İctimai Birliyi son 8 ayda saxta avtomobil hissələri seqmentini tədqiq etdi. Yalnız bir avtomobilin hissələri üzərində araşdırma apardıq, çünki istehlakçılar həmin avtomobilin hissələrini gətirib ofisimizə qoyublar. İlk öncə “Hyundai” markalı avtomobilin saxta ehtiyat hissələrini tədqiq etdik. Məlum oldu ki, bazarda çox miqdarda bu cür hissələr var”.

"dogruxeber.tv" xəbər verir ki, bu fikirləri demokrat.az-a açıqlamasında Azad İstehlakçılar İctimai Birliyinin sədri Eyyub Hüseynov bildirib.

Ekspert bildirib ki, satıcılar ofislərin üzərinə avtomobil markalarının adını yazır, istehlakçı elə bilir ki, həmin yerdə normal avtomobil satılır:


“Dövlət orqanlarında saxta “Hyundai” ehtiyat hissələrinin yığışdırılması ilə bağlı məsələ qaldırmışıq. Hazırda bu istiqamətdə işlər gedir. İstisna olunmur ki, Çin avtomobillərində də bu məsələ sürətlə yayılacaq. Həmin saxta ehtiyat hissələrinin əksəriyyəti Çindən gətirilir. “Hyundai” avtomobil hissələrini istehsal edən Mobis şirkəti öz mal nişanını Azərbaycanda qeydiyyata aldırıb. Buna baxmayaraq “Hyundai” üçün Çindən saxta hissələr gəlməkdədir. Çin avtomobillərinin özlərinin saxta ehtiyat hissələrinin ölkəmizdə olması da istisna edilmir.

Ümumiyyətlə, Çin mallarından narazılıq böyükdür. Avtomobillərin çoxlu satıcıları meydana çıxıb. Əksəriyyəti də “distributor” adı ilə cəlbedici reklamlarla insanları aldadır. Bu məsələyə son qoyulmalıdır. Müvafiq dövlət orqanları məsələ ilə ciddi məşğul olmasa, Çin avtomobilləri Azərbaycanda böyük problem yaşadacaq.

Avtomobillərin servis şəbəkələri məhdud vəziyyətdədir və hissələri barədə çatışmazlıq var. Avtomobillərin Azərbaycan benzininə uyğunlaşması məsələsində də problemlər yaşanır”.