"DogruXeber.tv" xəbər verir ki, ötən həftənin cümə günü Masallı rayonunda keçirilən tədbirdə millət vəkili Cavanşir Paşazadənin çıxışı sosial şəbəkələrdə və cəmiyyət arasında geniş rezonans doğurub.

Belə ki, deputat tədbir zamanı "Anım günü" ifadəsini düzgün anlamadan, onu sanki bir bayram və ya təntənəli gün kimi təqdim edib, hətta tədbir iştirakçılarını bunun münasibətilə təbrik edib. Bu isə həm tədbir iştirakçıları, həm də geniş ictimaiyyət arasında gülüş və eyni zamanda narazılıqla qarşılanıb.

Əslində "Anım günü" xalqımızın şəhidlərini yad etdiyi, onların müqəddəs xatirəsini ehtiramla andığı bir gündür. Təbrik yox, hüzn, ehtiram və sayğı günü. Millət vəkilinin bunu qarışdırması sadəcə “dil sürüşməsi” kimi deyil, anlayışsızlıq və məsuliyyətsizlik kimi qiymətləndirilir.

Video: My Webpagehttps://vt.tiktok.com/ZSDtDrk7t/

Digər tərəfdən, Cavanşir Paşazadənin çıxışında işlədilən cümlə quruluşları və ifadələr bir daha göstərdi ki, deputatlarımızın bir çoxu hələ də rəsmi nitq mədəniyyəti, düzgün ifadə qabiliyyəti və məsuliyyətli yanaşma baxımından ciddi problemlər yaşayır. Onun nitqindəki qüsurlar və səliqəsiz ifadələr də cəmiyyətin haqlı iradına səbəb olub. Çünki parlamentdə təmsil olunan şəxs hər kəlməsi ilə xalqı, dövləti və millətin dəyərlərini təmsil edir.

Millət vəkili səviyyəsində olan bir şəxsin belə yanlış çıxışı isə xalqda suallar doğurur: əgər bir deputat şəhidlərimizin xatirəsinə həsr olunmuş günlə bağlı söz seçimini belə düzgün edə bilmirsə, onda həmin şəxsin cəmiyyət qarşısında məsuliyyətini necə qiymətləndirmək olar?

"DogruXeber.tv" olaraq bildiririk ki, millət vəkilləri sadəcə mandat sahibi deyil, həm də xalqın dəyərlərinin qoruyucusu olmalıdır. Xüsusən şəhidlərin ruhuna həsr olunmuş günlərdə edilən çıxışlar daha həssas yanaşma tələb edir. Əks halda, belə anlaşılmazlıqlar həm cəmiyyətin inamını sarsıdır, həm də siyasi institutların nüfuzunu zədələyir.

Qarşı tərəfin cavab haqqını tanıyırıq!