Aprelin 4-də intihar məqsədilə özünü təhsil aldığı 162 saylı məktəbin 3-cü mərtəbəsindən aşağı atan 8-ci sinif şagirdi Elina Hacıyeva aprelin 6-da vəfat edib.

Hadisədən sonra sosial mediada şagirdin dəfn xərcləri ilə bağlı məlumatlar yayılıb. Həmin xərclərin içərisində məzarlıq yerinə də ödəniş edildiyi qeyd olunub.

Bununla bağlı Cebhe.info-nun suallarını cavablandıran Bakı Əhaliyə Vətəndaşlıq Xidməti Trestinin (BƏVXT) baş mühəndisi Sabir Həsənov bildirib ki, Bakıda məzar yeri pulsuzdur:

“Qəbiristanlığın tam adını bilməsəm, bu barədə geniş məlumat verə bilmərəm. Bakıda məzarlıqlar çoxdur, bizim nəzarət etdiyimiz qəbiristanlıqlarda 63 manat dövlət rüsumu var, onun üstünə isə ancaq tikinti materialının qiymətini gəlirik. Bundan başqa pul bizim nəzarətimizdə olan qəbiristanlıqlarda alınmır”.

Qeyd edək ki, BƏVXT-in nəzarətində ikisi Fəxri Xiyaban, Şəhidlər Xiyabanı olmaqla cəmi 32 qəbiristanlıq var.