Artıq çəki ilə doğulan körpələrin sayı getdikcə artır. Təkcə Azərbaycanda deyil, dünyada bu prosesin baş verməsi narahatlıq doğurur. Məsələnin ciddiliyi ilə bağlı UNİCEF də həyəcan təbili çalır.

Maraqlıdır, uşaqların artıq çəki ilə dünyaya gəlməsinə səbəb nədir?

Bununla bağlı Lent.az -a danışan pediatr və endokrinoloq Gündüz Əhmədov bildirib ki, uşaqların artıq çəki ilə dünyaya gəlməsi daha çox irsi ola bilər.

“Ata, ana, yaxud yaxın qohumlarda çəki problemi varsa, uşaq da artıq çəki ilə dünyaya gələ bilər. Bundan başqa, hamiləliyin uzun çəkməsi, yəni dölün 42 həftədən çox ana bətnində qalması, şəkərli diabet, hipotireoz xəstəliklərindən əziyyət çəkən anadan doğulan uşaqlar artıq çəki problemi ilə dünyaya gəlir. Eyni zamanda, uşaq genetik patologiya ilə doğulduqda bəzi irsi xəstəliklər də çəki probleminə səbəb ola bilər.

Ginekoloq Rəşad Sultan isə körpələrin artıq çəki ilə dünyaya gəlməsini ananın çox yeməsi və artıq kalori qəbul etməsi ilə əlaqələndirir.

“Günümüzün bəlası çox yemək, kalorili yeməklər, şirniyyat və qidalanma rejiminin yanlışlığıdır. Bu, artıq zərərli vərdiş hesab olunmalıdır. Günümüzü yemək stolu arxasında yox, təbiətdə gəzməklə, idmanla keçirməliyik. Yemək menyuları hamilələr üçün daha da önəmlidir. Hamilə qadın gündə 5-6 dəfə qidalanmalı, tez-tez, az-az yeməlidir. Çörək, düyü və xəmir xörəklərindən az istifadə etmək məsləhətdir. Gündə ən azı 3 litr su içmək, tərəvəz, göyərti, ət, toyuq və balıq yeməkləri lazımdır. Hamiləlikdə şəkərli diabet və qalxanabənzər vəzi çatışmazlığı müvafiq analizlərlə araşdırılmalı, varsa, müalicə almalıdır. Mənə qalsa, hər hamilə diyetoloq nəzarətində olmalıdır. Dölün çəkisinin çox olmasının qarşısını alsaq, qeysəriyyələrin də sayını azalda bilərik”.