Gələn ilin ilk ayından xarici avtomobillərin ölkəyə idxalına qoyulan məhdudiyyətlərə görə Azərbaycan avtomobil bazarında qiymətlərin qalxacağı bildirilir.

Moderator.az-a açıqlamasında hüquqşunas, nəqliyyat üzrə ekspert Ərşad Hüseynov bu ehtimalın böyük olduğunu bildirdi:

“Dövlət Gömrük Komitəsi bəyanat verib bildirdi ki, avtomobil idxalıyla bağlı şərtlər sərtləşdiriləcək. Bu da ondan ibarətdir ki, istifadədə olmuş avtomobillərin idxalı şərtləri dəyişdirilir. Hələlik təzə avtomobillərlə bağlı vergilərin yüksəldilməsi nəzərdə tutulmur. Nazirlər Kabineti buna getsə, bu yalnış olacaq. Çox istəyərdim ki, buna getməsinlər. Bunu etsələr, Azərbaycana gətirilən ikinci əl avtomobillərin ili təzə olduğuna görə qiyməti baha olacaq və bu, yerli bazara da təsir edəcək. Avtomobil dövriyyəsi xaricdən idxal hesabına çətinləşdiyinə görə daxildə olan avtomobillərin də qiymətinin artma ehtimalı var.

Bununla yanaşı, Gürcüstan və Rusiya dövlət nömrə nişanlı avtomobillərin də depozit hesabına ölkəyə giriş şərtləri sərtləşdirilir. Bəzi adamlar var idi ki, avtomobilə olan ehtiyaclarını bu üsulla ödəyirdilər. Bir şeyi vurğulamaq lazımdır ki, ölkəyə gətirilən bu cür avtomobillərin əksəriyyətini Azərbaycan vətəndaşları idarə edir və deməli onların bu avtomobillərə ehtiyacı var. Dövlət qurumları bunu vurğulamalıdır. Onlar da avtomobil ehtiyaclarını bu şəkildə ödəyə bilməyəndə daxili bazara üz tutacaqlar. Bu da daxili bazarda tələbatı artırdığına görə hansısa şəkildə avtomobillərin qiymətinin bahalaşmasına səbəb ola bilər”.