Azərbaycan son model texnologiya əsasında istehsal olunmuş silahlardan istifadə edir və Ermənistanın hərbi infrastrukturuna fasiləsiz zərbələr endirir.
dogruxeber.tv bildirir ki,bu sözləri Axar.az-a açıqlamasında sabiq Xarici İşlər naziri, politoloq Tofiq Zülfüqarov deyib.
O bildirib ki, qısa müddətdə çox böyük hərbi nəticələr gözləmək lazım deyil:
“Bu “hərbi xuntanı” dağıtmaq üçün zaman lazımdır. Azərbaycan Ordusu artıq böyük irəliləyişlər əldə edib və qələbə əzmimiz artan xətlə inkişaf edir”.
Politoloqun fikrincə, Ermənistan tərəfi sülh istəmir:
“Erməni tərəfinin yeganə məqsədi itki verməmək üçün sülh danışıqları mərhələsinə geri qayıdıb vaxt qazanmaq, sülh danışıqları prosesini uzatmaqdır. Bizsə işğalın davam etməsini istəmirik. Cənab Prezidentin dünən bu haqda etdiyi çıxış bunun sübutudur”.
Tofiq Zülfüqarov Qarabağ klanının müharibə şəraitindən istifadə edərək öz təsir dairəsini genişləndirməyə çalışdığını da vurğulayıb:
“Hazırda işğal olunmuş ərazilərdə qondarma rejimin çərçivəsində böyük bir gərginlik hökm sürür. Qarabağ klanının nümayəndələri bu vəziyyətdən istifadə edib Dağlıq Qarabağ ərazisində öz mövqelərini gücləndirməyə çalışır. İşğal olunmuş ərazilərdə artıq ikihakimiyyət mövcuddursa, hesab edirəm ki, tezliklə bu proses Ermənistanın özündə də baş verəcək”.