Ermənistan ilə Azərbaycan arasındakı müharibə göstərdi ki, tank pilotsuz uçan aparatlar üçün asan hədəfdir. Cəmi bir neçə həftə ərzində İrəvan onlarla döyüş təyinatlı maşınını itirdi.

dogruxeber.tv bildirir ki, bu barədə Rusiyanın “Vzqlyad” nəşri nüfuzlu yazıb. Nəşrdə II Qarabağ müharibəsinin zirehli texnikanın, xüsusilə də tankların yüksək texnologiyalı pilotsuz aviasiyaya qarşı həssaslıq nümayiş etdirdiyi qeyd olunub.

“Azərbaycan hərbi dövlət deyil, lakin “Bayraqdar” pilotsuz uçan aparatlardan, “Harop” və “Skaystriker” kimi döyüş sursatlarından istifadə etməklə münaqişənin inkişaf ssenarisini qəbul etdirə bildi”, – deyə qeyd olunub.

Nəşrdə Rusiya Federasiyasının Hərbi Elmlər Akademiyasının professoru Vadim Kozyulinin fikirləri də yer alıb. Onun sözlərinə görə, Ermənistan ilə Azərbaycan arasında müharibə yeni hərbi reallığı ortaya qoyub – tank təkbətək döyüşdə pilotsuz təyyarəyə qarşı gücsüz qalıb:

“Bu müharibədən sonra bütün dünyada pilotsuz uçan aparatlardan qorunmanın təsirli yolları axtarılır, lakin ən müasir hava müdafiə sistemi belə bu problemin tam həllinə zəmanət vermir. Yalnız modernləşdirmək deyil, həm də tankları pilotsuz təyyarələrdən qorumaq üçün tamamilə yeni fərdi sistemlər yaratmaq lazımdır. Mövzu hələ bağlanmayıb. Bu, hərbçilər üçün ciddi bir problemdir və böyük investisiyalar tələb edəcək”.