Ötən gün istefa verən Ermənistan Müdafiə Nazirliyinin hərbi nəzarət xidmətinin rəisi və Baş qərargahın keçmiş rəisi olan general-polkovnik Movses Hakobyan mətbuat konfransı keçirərək istefasının səbəbini açıqlayıb.

dogruxeber.tv bildirir ki, Movses Hakobyan ordudan tərxis olunma qərarını 5 oktyabr tarixində verdiyini deyib. Ancaq müharibənin ortasında geri çəkilmənin orduya zərər verəcəyini düşündüyü üçün Hakobyan Silahlı Qüvvələrə imkanları çərçivəsində kömək etməyə davam etdiyini qeyd edib.
Lakin, Movses Hakobyan baş nazir Nikol Paşinyanın hərbçiləri Qarabağdan Yerevana qayıtmağa və ona etiraz edən xalqı nəzərdə tutaraq "divar dibində ulayan"larla bağlı məsələləri həll etməyə çağırmasından sonra istefa vermək qərarına gəlib.

Hakobyan qeyd edib ki, müharibənin davam etdiyi 44 günü ərzində ölkəni dərin böhrana qərq edən yalanlar yayılırdı: "Məlumat mərkəzinin vəzifələrindən biri də düşməni çaşdırmaqdır. Ancaq bu məsələdə bir standart var - yayılan məlumatların arasında yalan informasiya 30% -dən çox olmamalıdır. Ermənistanda isə yalan informasiya yayılan məlumatların 100%-ni təşkil edirdi. Buna görə insanlar arasında, ordu arasında ortaya çoxsaylı suallar çıxırdı".
\Yeniavaz.com