Kosovodakı günəş enerjisi fermasının işçiləri günəş panellərinin ətrafındakı otları biçmək üçün öz enerjilərini sərf etməkdən yorulanda, daha yaşıl və daha güclü biçən "maşın"a - qoyun sürüsünə müraciət ediblər.

"dogruxeber.tv" Reuters-ə istinadən bildirir ki, Kosovonun şərqindəki kiçik Kamenica şəhəri yaxınlığındakı Rogane günəş fermasında - 12 mindən çox fotovoltaik panelin quraşdırıldığı sahədə 100-dən çox qoyun və bir neçə keçi həftədə iki dəfə otlayır.

72 yaşlı çoban Rexhep Rrudhani çoban itlərinə panellərin altında otarılan sürüləri manevr etməyi əmr edərkən, "Fəhlələr tarlaları biçməyin çox çətin olduğunu başa düşdülər, məndən qoyunlarımı gətirə biləcəyimi soruşdular" - deyə bildirib.

“Qoyunlar burada yaxşı və ya pis hər cür ot yeyir və hər şeyi təmizləyirlər. Hamımız faydalanırıq”.


Kosovonun 12-14 milyard ton arasında sübut edilmiş aşağı dərəcəli linyit kömür ehtiyatları var ki, bu da dünyada beşinci ən böyükdür. Elektrik enerjisinin 90%-dən çoxu kömürdən, qalan hissəsi isə bərpa olunan enerji mənbələrindən, əsasən külək və günəşdən istehsal olunur.

Ölkə 2050-ci ilə qədər kömürdən imtina etməyi hədəfləyir.

Günəş zavodunun meneceri Arber Maliqi, "Biz qazonbiçən maşınlara heç bir benzin sərf etmirik" dedi. "Günəşdən enerji istehsal etmək və qoyunlarla ot biçmək burada iki dəfə yaşıllaşmaq deməkdir."

dogruxeber.tv
Kamal Əsgərov