"dogruxeber.tv" yomiuri.co.jp-na istinadən xəbər verir ki, Yaponiya və Çin ötən gün Vyanada keçirilən beynəlxalq nüvə silahının yayılmaması ilə bağlı toplantıda Tokionun fəlakət nəticəsində zədələnmiş Fukusima №1 AES-dən təmizlənmiş suyun dənizə buraxılması planı ilə bağlı mübahisə edib.

Çin 2026-cı il Nüvə Silahlarının Yayılmaması Müqaviləsinin nəzərdən keçirilməsi konfransına hazırlıq komitəsinin iclasında bildirib ki, beynəlxalq ictimaiyyət Yaponiyanın planından narahatdır və Tokio çirklənmiş suyu zorla buraxmaq planını geri götürməlidir.

Buna cavab olaraq Yaponiya bildirib ki, Beynəlxalq Atom Enerjisi Agentliyi suyun buraxılması planının beynəlxalq təhlükəsizlik standartlarına uyğun olduğu və axıdmanın cüzi radioloji təsir göstərəcəyi qənaətinə gəlib.

Daha sonra Çin MAQATE-nin araşdırmasının legitimliyini şübhə altına aldı və təmizlənmiş su ilə bağlı məlumatların doğru olub-olmamasının məlum olmadığını deyib.

Yaponiya cavab olaraq bildirib ki, Çinin iddiaları çox təhlükəlidir, çünki qeyri-dəqiq məlumatlarla MAQATE-nin səlahiyyətləri sarsılır.

Almaniya Yaponiyanın tərəfini tutaraq, MAQATE-nin müstəqil araşdırması vasitəsilə təhlükəsizlik standartlarının yerinə yetirildiyinə əmin olduğunu bildirib.

dogruxeber.tv
Gültəkin Talıbqızı