İspaniyanın Ali Elmi Tədqiqatlar Şurasının (CSIC) Geologiya və Mədən İnstitutunun alimləri Kanar adalarının Lanzarote sahillərində üç vulkandan ibarət batmış dağ aşkar ediblər. Tədqiqatçıların fikrincə, bu yer suyun altında batmış mifik ada sivilizasiyası olan əfsanəvi Atlantidanı xatırladır.

"dogruxeber.tv" xəbər verir ki, bu barədə CSIC-in rəsmi saytında məlumat verilib.

Komandanın məlumatına görə, dəniz dağının diametri 50 kilometr, bazası isə okean səthindən 2,3 kilometr aşağıda yerləşir. Zirvəyə Los Atlantes adı verilib.

Elm adamları uzaqdan idarə olunan vasitə ilə Lanzarotenin şərq sahillərində dəniz dibini araşdırarkən Los Atlantes dağını tapıblar. Tədqiqatın göstərdiyi kimi, Los Atlantes Eosendə (56-34 milyon il əvvəl) arxipelaqı olub. Vulkanlar püskürməyi dayandırdıqda, lava bərkiyib və sıxlaşaraq adaların batmasına səbəb olub.

Alimlər müəyyən ediblər ki, sualtı adalarda çimərliklər, qayalıqlar və qum təpələri var. Onlardan bəziləri okeanın səthindən cəmi 60 metr aşağıdadır. Dəniz səviyyəsinin xeyli aşağı olduğu son buz dövründə bu ərazilərdə vəhşi heyvanlar məskunlaşmış ola bilərdi.

Tədqiqatçılar 2025-ci ildə Kanar adalarının sualtı vulkanlarına yeni ekspedisiya təşkil etmək niyyətindədirlər.