Cənubi Amerika ölkəsi Çilidə ölkənin 99 faizini əhatə edən elektrik enerjisinin kəsilməsi səbəbindən fövqəladə vəziyyət elan edilib.

"dogruxeber.tv" xarici KİV-ə istinadən xəbət verir ki, təxminən 19 milyon insan işıqsız qalıb. Demək olar ki, bütün ölkə elektriksiz qaldıqdan sonra hökumət başda paytaxt Santyaqo olmaqla bir çox bölgədə komendant saatı tətbiq edib.

Çili prezidenti Qabriel Boric fövqəladə vəziyyətlə bağlı açıqlama verib.

"Bu gün baş verənlər hamımızı qəzəbləndirir. Bir və ya bir neçə şirkətin məsuliyyətsizliyi ucbatından milyonlarla insanın gündəlik həyatı mənfi təsirə məruz qalıb. Məsul şəxslərin məsuliyyətə cəlb olunmasını təmin edəcəyik. Biz də qurumların düzgün işləməsini və bu fövqəladə vəziyyətin mümkün qədər tez başa çatmasını istəyirik", - deyə ölkə rəhbəri qeyd edib.

Ölkədə ticarət fəaliyyəti dayandırılarkən, ictimai təhlükəsizliyi təmin etmək üçün minlərlə polis və əsgər müəyyən məntəqələrə təyin edilib.