İranın BMT-dəki daimi nümayəndəliyi ABŞ prezidenti Donald Trampın İslam İnqilabının Rəhbəri Ayətullah Seyid Əli Xameneiyə yeni nüvə sazişi üzrə danışıqlar təklifi ilə bağlı məktub göndərməsi ilə bağlı məlumatı təkzib edib.

"dogruxeber.tv" xəbər verir ki, bu barədə “Mehrnews” məlumat yayıb.

“Biz hələ belə bir məktub almamışıq”, - nümayəndəlik bildirib.

Tramp daha əvvəl İranla nüvə sazişi üzrə danışıqlar aparmaq istədiyini bildirib və cümə axşamı ölkə liderlərinə danışıqlara razılıq verəcəklərinə ümid ifadə edən məktub göndərdiyini deyib.

“Mən dedim ki, ümid edirəm danışıqlar aparacaqsınız, çünki bu, İran üçün daha yaxşı olacaq”, - Tramp “Fox Business Network”ə müsahibəsində deyib.

“Düşünürəm ki, onlar bu məktubu almaq istəyirlər”, Tramp əlavə edib.

İran dəfələrlə nüvə silahı yaratmaq niyyətində olmadığını bildirib və nüvə texnologiyasının yalnız mülki məqsədlər üçün nəzərdə tutulduğunu vurğulayıb.