Pakistanın müdafiə naziri Xavaca Asif Hindistanla qarşıdurmanın mümkün eskalasiyasından ciddi narahatlığını ifadə edərək, iki nüvə dövləti arasında münaqişənin qlobal risklər daşıdığını vurğulayıb.

"dogruxeber.tv" xəbər verir ki, o, "SkyNews"a verdiyi müsahibədə diplomatik həll ümidlərinə baxmayaraq, istənilən təxribatın gözlənilməz nəticələrlə dolu genişmiqyaslı müharibəyə səbəb ola biləcəyini söyləib.

Asif Pakistanın Hindistanın aqressiv hərəkətlərinə eyni cür cavab vermək məcburiyyətində qalacağını qeyd edib və beynəlxalq ictimaiyyəti, xüsusilə də ABŞ prezidenti Donald Trampı gərginliyin azaldılmasında daha fəal iştirak etməyə çağırıb. Onun sözlərinə görə, Vaşinqton hər iki tərəfə təsiri ilə fəlakətli ssenarinin qarşısının alınmasında əsas rol oynaya bilər.

Bəyanat atəşkəsin müntəzəm olaraq pozulduğu qaynar nöqtə olaraq qalan Kəşmirlə bağlı uzun müddətdir davam edən ərazi mübahisəsi fonunda verilib.

Xatırladaq ki, aprelin 22-də Kəşmirdə 26 nəfərin ölümü ilə nəticələnən terror aktı Hindistan və Pakistan arasında münasibətlərdə yeni gərginliyə səbəb olub. Hindistan mətbuatının məlumatına görə, ölkə kəşfiyyatı terror aktında Pakistan kəşfiyyat orqanlarının iştirakına dair sübutlar aşkar edib.