Dünən Elm və Təhsil Nazirliyi mərkəzi imtahanla lisey və gimnaziyalara şagird qəbulunda ciddi yenilik etdiyini açıqladı. Bildirildi ki, mərkəzləşdirilmiş qaydada qəbula bu ildən yalnız 6-cı siniflər iştirak edəcək. Bu qərarın lisey qəbuluna bir neçə həftə qalmış açıqlanması övladını liseyə hazırlayan valideynlərin narazılığına səbəb olub.


"dogruxeber.tv" xəbər verir ki, övladı liseyə hazırlaşan jurnalist Dünya Sakit bu qərara təəssüfləndiyini bildirib. O bildirib ki, niyə bu qərara gəlindiyinə dair ictimaiyyətə heç bir açıqlama, izahat, əsaslandırma verilmir:

“Hansı tədqiqatlar aparılıb, 5-ci sinfə qəbulun mənfi təsirləri üzə çıxarılıb ki, bu qərar verilib? Məqsəd nədir, nəyə nail olunacaq? Təhsilin səviyyəsinə hansı təsirləri olacaq?
Nəhayət, ən mühüm məsələ: bu qərar əgər elmi tədqiqat nəticəsidirsə, bir-iki aya qəbul olunmayıb, azı 5-6 ay əvvəldən məlum idi. Bu halda, niyə vaxtında ictimaiyyətə elan olunmadı? Minlərlə valideyn ailəsinin boğazından kəsib övladını hazırlığa qoymuşdu. Nəyi gözlədilər: hazırlıq kursları, sınaq təşkilatçıları qazandıqlarını qazansınlar, sonra???
Bunu DİM etsəydi, hurr eliyib düşərdi hamı üstünə”.

Digər valideyn jurnalist Vüsalə Rüstəmova da qərara narazılığını bildirib:

“Ölkədə liseyə hazırlıq ən bahalı və məşəqqətli hazırlıq növlərindən sayılır. Valideynlər boğazlarından kəsib 2-3 il uşaqlarını liseyə hazırlayırlar. Proqramın məktəb proqramından fərqlənməsi səbəbindən Elm və Təhsil Nazirliyinin bu sahədə yaratdığı bazara hələ heç toxunmuram.
Lisey qəbuluna bir neçə həftə qalmış Elm və Təhsil Nazirliyi açıqlama verir ki, mərkəzləşdirilmiş qaydada qəbulda yalnız 6-ci siniflər iştirak edəcək. Halbuki, indiyədək 4-8-ci siniflər arasında olurdu. Valideynlər 3-cü sinifdən uşaqlarına pul töküb hazırlığa qoyub. Liseylərə hazırlıq proqramı məşəqqətli bir proses olduğuna görə körpələr həyatdan məhrum edilir, sutkanın 24 saatının böyük hissəsini hazırlıqlarına sərf edirlər. Bəlkə bir günə 100-200 misal, məsələ, çalışma edirlər. İstirahətdən tam məhrum formada. İndi bu qədər məşəqqətə 1-2 ildir ki, qatlanan uşaqlara ilin sonunda məlum olur ki, liseyə sənəd verə bilməzlər. Olmazdı ki, bunu sentyabrdan bildirəsiniz, ailələr, uşaqlar bu qədər vaxt, pul itirməsinlər? Siz nə yeyib, nə içirsiniz?”.//Tribunainfo.az