Bəzi hallarda insan həyatındakı uğursuzluqların səbəbini gerçək səbəblərdə deyil, mistik və izahı olmayan qüvvələrdə axtarmağa meyilli olur. Cadu, sehr və digər mistik inanclar əsrlərdir insanların zəif anlarında onlara "ümid" kimi təqdim edilir. Halbuki bu inanc çox vaxt qorxu, təşviş, özünü günahlandırma və qərarsızlıq kimi psixoloji yüklər yaradır.

“dogruxeber.tv” olaraq qeyd edirik ki, cadunun varlığına inam bəzən insanın həyatını idarə etməsinə, qərarlarını manipulyasiya etməsinə və hətta sosial çevrəsindən uzaqlaşmasına gətirib çıxarır.

Ən təhlükəlisi isə odur ki, bu inam bəzi insanlar tərəfindən maddi qazanc üçün istismar olunur. Cadu ilə “problemi həll edəcəyini” iddia edən şəxslər çox vaxt insanların zəif yerlərindən istifadə edərək onları psixoloji asılı vəziyyətə salır. Bu isə real problemlərin arxa plana keçməsinə, ailədaxili gərginliklərin, ruhi pozuntuların və hətta maddi tükənmələrin yaranmasına səbəb olur. İnsanlar çox vaxt caduya qarşı “cadu ilə cavab verməyi” çıxış yolu kimi görürlər, halbuki bu yanaşma sadəcə qorxunu daha da dərinləşdirir.

Bütün bu inanc və davranışlar birbaşa olaraq insanın özünə inamını və həyat üzərindəki nəzarət hissini zəiflədir. Elmi əsaslara söykənməyən və sübut olunmamış anlayışların gündəlik həyatımıza daxil olması, həm fərdi, həm də ictimai səviyyədə risklidir.