dogruxeber.tv: - Azərbaycan futbolunun son illərdəki yeganə uğur hekayəsi sayılan “Qarabağ” uzun illərdən sonra Çempionlar Liqası turnirinə vəsiqə qazanaraq hamımızı sevindirdi. Şübhəsiz ki, bu, həm ölkə reytinqi və futbolu, həm də maliyyə baxımından böyük bir nailiyyət idi.
Açıqlanan məlumata görə, klubun qazandığı ümumi gəlir 23,78 milyon avrodur ki, bunun 18,62 milyonu UEFA-nın bütün iştirakçılara ödədiyi başlanğıc haqqı, qalan təqribən 5 milyonu isə əmsal və bazar payından gəlib. Digər tərəfdən, ölkə başçısı da “Qarabağ”-ın bu uğurunu yüksək qiymətləndirib və kluba 5 milyon manatlıq mükafat təqdim edilib.


Ancaq maraqlıdır ki, klub Çempionlar Liqasından milyonlarla avro qazansa, əlavə maliyyə dsətəyi alsa da, transfer siyasətindəki ehtiyatlı və qənaətcil davranışlarından əl çəkmək istəmir. Bu gün mətbuatda yayılan xəbərlərə görə, “Qarabağ” rəhbərliyi sabiq məhsuldar oyunçusu Olavio Juninyo transferində də eyni cür davranıb.

Özü də bunu klubların turnirdə iştirak edəcək oyunçularının siyahısını təqdim etmə müddətinə sayılı saatlar qalmış, heyətində isə hələ ölkə çempionatı üçün orta səviyyəli hesab olunacaq 2 forvardı – Nəriman Axundzadə və Musa Qurbanlı olduğu bir vaxtda edib.

Belə ki, mediada yayılan məlumata görə, klub rəhbərliyi 5 milyona satdığı Juninyonu “Flamenqo”-nun 4 milyon istəməsinə qarşılıq bu transferdən imtina edib.


Belə ki, "sportinfo.az" xəbər verir ki, Ağdam təmsilçisi "sambaçı"nı icarəyə götürmək istəsə də, "Flamenqo" razılaşmayıb. Braziliya klubu bu ilin yanvarında 5 milyon avroya "Qarabağ"dan transfer etdiyi hücumçu ilə müvəqqəti vidalaşmağa müsbət yanaşmayıb.

Braziliya təmsilçisinin nümayəndəsi "Qarabağ" tərəfinə 29 yaşlı forvardı birdəfəlik satmaq niyyətində olduqlarını bildirib. O, yalnız 4 milyon avro qarşılığında bu keçidin mümkün olacağını qeyd edib. "Qarabağ" isə həmin məbləği ödəməkdən boyun qaçırıb.

Bununla yanaşı, Fransanın "Loryen" klubunda çıxış edən forvard Sambou Soumanonu heyətinə qatmaq istəyən Ağdam təmsilçisi burada da eyni “qənatcil” yanaşma fəlsəfəsinə sadiq qalıb.

Fransa klubu ilə müqaviləsi olan forvard üçün "Qarabağ" 2.5 milyon avro transfer məbləği və 500 min avro bonus təklif edib. Lakin qarşı tərəf Azərbaycan klubunun bu təklifi ilə razılaşmayıb. Onlar S.Soumano üçün 5 milyon avro və müxtəlif bonuslar istəyiblər. "Loryen" hücumçunun "Qarabağ"da hər mövsüm oynaması üçün də ödənişlər tələb edib. Bu səbəbdən hələlik transferin baş tutması real görünmür. Sonradan Fransa klubunun məbləği 3,5 milyon avroya saldığı, ancaq "Qarabağ"ın 2.5 milyon avrodan artıq vermədiyi bildirilir.

Belə çıxır ki, "Qarabağ” rəhbərliyi transfer üçün cəmi 2,5 milyon vəsait ayırıb. Niyə?

Hər halda klub rəhbərliyinə xatırlatmaq yerinə düşər ki, Çempionlar Liqasının səhnəsi sıradan bir turnir deyil. Burada yalnız taktika və intizamla nəticə əldə etmək mümkün olmur, oyunçunun fərdi ustalığı, hücum keyfiyyəti də həlledici rol oynayır. Ona görə də illər sonra belə bir turnirə qatılmağa haqq qazanan klubun 1-2 milyon avro artıq xərc çəkməmək naminə orta səviyyədən aşağı hücumcularla "Liverpul", "Çelsi", "Benfika" kimi klubların qarşısına çıxmaq isəyi ən yumşaq deyimlə "intihara" bərabər bir addım hesab olunmalıdır.

Və həm də untumaq olmaz ki, “Qarabağ” artıq təkcə Azərbaycan çempionu deyil – o, Avropanın ən böyük səhnəsində ölkəni təmsil edən bir brenddir. Bu səbəbdən də yaşanan xoşagəlməzliklər, böyük hesablı məğlubiyyətlər də əlimizdəki yeganə brendə zərbədir.

İndiki durumda “Qarabağ”-ın az da olsa qardaş ölkə təmsilçisi “Qalatasaray”-ın transfer siyasətindən nümunə götürməsi pis olmazdı. Yeri gəlmişkən qapıçı transferində “Mançestr Siti”-də çıxış edən Ederson Moraesi heyətinə qata bilməyən “cimbom” dərhal “Trabzonspor”-da çıxış edən Uğurcan Çakırı dəyərindən bir neçə dəfə artığına – 27, 5 milyon avroya transfer edib. Təkcə bu nümunə eyni turnirdə mübarizə aparacaq bu iki klubun müsabiqəyə və AZARKEŞLƏRİNƏ olan yanaşma tərzini özündə əks etdirir.

Unutmadan əlavə edək ki, klubların turnirin qrup mərhələsində hər qələbə üçün 2,8 milyon avro, heç-heçə üçün isə 930 min avro bonus qazanmaq imkanı var. Əlavə olaraq, komanda pley-off mərhələsinə yüksəlsə, gəlirləri qat-qat arta bilər.Yəni, Juninyonun vuracağı qol və ya qollarla “Qarabağ” qələbələr əldə edə, oyunçunun transfer xərcini də bu yolla qarşılaya bilərdi.

Amma reallıq odur ki, klub rəhbərliyi bundan sonra çətin ki, əldə etdiyi 20 milyon avrodan artıq gəliri transferlərə yönəltsin. Çünki bunun üçün artıq nə zaman, nə də istək var. Əsl maraq doğuran məqam odur ki, "Qarabağ" klubunun rəhbərliyi "kassa”sında "bərk-bərk" saxladığı bu vəsaiti hara xərcləyəcək?(Azpolitika)