Son illər sağlam həyat tərzi ilə maraqlananlar arasında soyuq duşlar və qısamüddətli aclıq praktikaları geniş yayılıb. Bu metodlar təkcə fiziki sağlamlıq üçün deyil, beyin funksiyalarının yaxşılaşdırılması baxımından da diqqət çəkir.

“dogruxeber.tv” bildirir ki, qısa müddətli, sistemli şəkildə tətbiq edilən bu yanaşmalar beynin stressə qarşı dözümlülüyünü artırır, diqqət və motivasiyanı gücləndirir, həmçinin emosional tarazlığı dəstəkləyir.

Soyuq duşlar bədəndə “norepinefrin” adlı neyrotransmitterin səviyyəsini artıraraq beyin fəaliyyətini oyadır.

“dogruxeber.tv” yazır ki, bu maddə əhval-ruhiyyənin sabitləşməsi, diqqətin mərkəzləşməsi və enerjinin yüksəlməsi ilə birbaşa əlaqəlidir. Soyuq suya məruz qalma, həmçinin qan dövranını gücləndirir və beyin hüceyrələrinə daha çox oksigen daşınmasına şərait yaradır. Bu proses nəticəsində neyroplastiklik – yəni beynin yeni məlumatları mənimsəmə qabiliyyəti – artmış olur.

Qısamüddətli aclıq isə bədəndə “BDNF” (brain-derived neurotrophic factor) adlı zülalın səviyyəsini artırır. Bu zülal sinir hüceyrələrinin yenilənməsi və qorunmasında mühüm rol oynayır. Qısa müddətli, nəzarət altında aparılan aclıq beyin hüceyrələrini stresə qarşı daha davamlı edir, yaddaş və öyrənmə qabiliyyətini gücləndirir. Aclıq zamanı bədənin enerji istehsalı daha səmərəli hala gəlir, insulin səviyyəsi tənzimlənir və bu da beyin üçün faydalı mühit yaradır. Eyni zamanda, bu yanaşmaların balanslı şəkildə tətbiqi zəruridir, çünki ifrat tətbiqlər əks effekt verə bilər.