Quba rayon İcra Hakimiyyəti keçirdiyi tenderin nəticəsini açıqlayıb.

"dogruxeber.tv" Tribunainfo.az-a istinadən xəbər verir ki, həmin müsabiqənin məqsədi Quba şəhərində yolların əsaslı təmiridir.

Tenderin qalibi “GƏNCƏ KÖRPÜ TİKİNTİ-2” ASC olub. Şirkətlə İcra Hakimiyyəti arasında 2 milyon 125 min 696 manatlıq müqavilə imzalanıb.

Qeyd edək ki, Quba İcra Hakimiyyəti son bir ildə 4 tender keçirib. Həmin tenderlərdən ikisi yolların əsaslı təmiri ilə bağlı olub. Belə ki, İcra Hakimiyyəti hələ ötən ilin noyabrında bu işlərə 1 milyon 965 min 572 manat xərcləyib. Bu işləri isə “GÖYGÖL TİKİNTİ” MMC həyata keçirib.

Tribunainfo.az-ın açıq mənbələr üzərindən apardığı araşdırma zamanı məlum olub ki, sözügedən qurum Quba rayonu ərazisində abadlıq işlərinin və Quba şəhərinin yaşıllaşdırılması ilə bağlı xidmətlərin satınalınması üzrə də iki tender keçirib. Ötən ilin noyabr-dekab aylarına təsadüf edən bu müsabiqələrin qalibi “STAR TƏMİR CONSTRUCTİON” MMC olub. Bu işlər üçün isə Quba İcra Hakimiyyəti şirkətə 1 milyon 481 min 402 manat və 247 min 776 manat pul ödəyib.